„HB Grandi áformar að láta af botnfiskvinnslu á Akranesi,“ segir í upphafi yfirlýsingar sem Vilhjálmur Vilhjálmsson forstjóri HB Granda las upp á blaðamannfundi sem var að ljúka á Akranesi. Stefnt er að því að sameina botnfiskvinnslu félagsins á Akranesi við vinnsluna í Reykjavík og segja upp öllum 93 starfsmönnum fyrirtækisins sem unnið hafa við bolfiskinn á Akranesi. Búið er að ræða við starfsfólk og tilkynna þeim um ákvörðunina. Eðli málsins samkvæmt fengu tíðindin mjög á starfsfólk. Ef af þessu verður leggst af samfelld 111 ára fiskvinnsla í fyrirtækinu á Akranesi, sem hófst með stofnun HB&Co árið 1906. Fastlega má gera ráð fyrir að ákvörðun þessi hafi þær afleiðingar að a.m.k. 150 störf tapist úr samfélaginu á Akranesi, við flutninga, ýmis iðnaðarstörf og þjónustu. Þumalputtaregla er sú að starfsemi af þessum toga fylgi 50% fleiri störf en þeirra sem beint starfa hjá viðkomandi fyrirtæki.

Aðspurður um ástæður þessarar ákvörðunar segir forstjóri HB Granda þær vera hátt gengi íslensku krónunnar, kostnaðarhækkanir svo sem vegna launa og óbreytt fiskverð síðustu tvö ár á erlendum mörkuðum.

Forsvarmenn Akraneskaupstaðar og Verkalýðsfélags Akraness munu í kvöld stefna á fund með þingmönnum kjördæmisins. Að sögn Ólafs Adolfssonar formanns bæjarráðs og Vilhjálms Birgissonar formanns Verkalýðsfélags Akraness verður öll áhersla lögð á að knýja stjórn HB Granda til að hverfa frá þessari ákvörðun. „Það er með öllu óásættanlegt að fyrirtæki geti með einu pennastriki ákveðið að hætta allri fiskvinnslu í heilu bæjarfélagi og hverfa á braut. Þarna kristallast í hnotskurn hin dökka hlið núverandi fiskveiðistjórnunarkerfis. Hér verða þingmenn að koma að máli,“ sagði Vilhjálmur Birgisson í samtali við Skessuhorn. Ólafur Adolfsson segir að ákvörðun HB Granda sé reiðarslag fyrir starfsfólk fyrirtækisins og samfélagið allt. „Mér finnst að forsvarmenn HB Granda séu að koma í bakið á okkur og þessi ákvörðun er ómakleg af þeirra hálfu,“ sagði Ólafur.

Innan samsteypu HB Granda á Akranesi hafa 270 starfað. Fyrirtækið rekur, auk botnfiskvinnslunnar; skipaverkstæði, fiskimjölsverksmiðju, loðnuvinnslu og tvö dótturfyrirtæki, Norðanfisk og Vigni G. Jónsson á Akranesi. „Stefnt er að frekari uppbyggingu og eflingu þess rekstrar á Akranesi,“ sagði Vilhjálmur Vilhjálmsson. Aðspurður segist hann ekki geta lofað neinum þeirra sem nú verður sagt upp störfum vinnu á öðrum stöðum innan samsteypunnar, hvorki á Akranesi, Reykjavík né annarsstaðar. Fram kom á fundinum í dag að lögbundið samráðsferli vegna hópuppsagna sé þegar hafið. Ekki hefur þó verið haft samband við Vinnumálastofnun vegna málsins og starfsfólki hefur heldur ekki verið afhent uppsagnarbréf.

Það var ekki létt yfir forsvarmönnum Akraneskaupstaðar og Verkalýðsfélags Akraness við þessi tíðindi. F.v. Sævar Freyr Þráinsson, Vilhjálmur Birgisson og Ólafur Adolfsson.

Öllu starfsfólki bolfiskvinnslu HB Granda á Akranesi verður sagt upp