Ágætis horfur eru á byggingamarkaði á Akranesi. Að sögn Sigurðar Páls Harðarsonar sviðsstjóra skipulags- og umhverfissviðs er nú verið að byggja á nokkrum stöðum. Auk þess eru lausar til umsóknar tæplega 40 íbúðarhúsalóðir og mun þeim fjölga þegar líður á árið. „Sú uppbygging sem er fyrst og fremst í gangi er í Skógarhverfi 2. Þar eru byrjaðar framkvæmdir við fjölbýlishúsalóðir og verið að byggja bæði parhús og raðhús. Fjölbýlishús við Asparskóga 27 verður tilbúið í sumar og sami framkvæmdaaðili mun reisa tvö fjölbýlishús til viðbótar við Asparskóga 24 og 29. Samtals eru þetta 32 íbúðir,“ segir Sigurður Páll. Hann segir það aðallega vera verktaka sem sæki um fjölbýlishúsalóðirnar. „En einstaklingar og fyrirtæki sækja um parhúsa- og einbýlishúsalóðirnar. Það er búið að úthluta einhverjum slíkum lóðum. Trésmiðjan Akur hefur til dæmis lokið við byggingu við Blómalund 2-4 og það eru að bætast tvö parhús við til viðbótar í þeirri götu, ásamt raðhúsalengju.“ Sigurður Páll segir að til standi að fleiri rað- og parhús verði reist og einnig sé verið að byggja einbýlishús við nokkrar götur í Skógarhverfi. „Þetta er svona í pípunum og svo er verið að spyrjast fyrir um eitt og annað. Það líður varla sá dagur að ekki berist einhverjar fyrirspurnir,“ heldur hann áfram. Hann segir að einnig sé verið að skoða hugsanlegar breytingar annars staðar í bænum. Við Vallholt 5 sé skipulagsferli í gangi en þar verður gert ráð fyrir fjölbýlishúsi með tólf íbúðum. „Það var áður tengt fjölbrautaskólanum og breytingin felst í því að núna yrðu íbúðirnar fyrir almennan markað.“

Forgangur að ljúka skipulagsvinnu

Þá eru einnig í pípunum tvö stór mál sem eru í skipulagsferli. Annars vegar er um að ræða Dalbrautarreitinn og hins vegar Sementsreit. „Þetta er í báðum tilfellum skipulagsvinna sem er komin vel af stað en svolítið eftir að hún klárist. Það er töluvert magn íbúða þar undir. Um 200 íbúðir eru á Dalbrautarreitnum en þær eru töluvert fleiri á Sementsreitnum,“ segir Sigurður Páll. Þegar skipulagsferli lýkur þarf yfirleitt að fara í framkvæmdir tengdar gatnagerð. Sigurður segir að á Dalbrautarreitnum þurfi ekki að fara í miklar aðgerðir til að gera lóðirnar byggingarhæfar. „Þar er mest allt til staðar. Varðandi Sementsreitinn, þá verða fyrstu lóðirnar sem fara út við Suðurgötuna og það er í sjálfu sér allt klárt.“ Samhliða skipulagsvinnunni við Sementsreitinn er verið að útbúa gögn varðandi niðurrif mannvirkja á reitnum. Reiknað er með því að þær framkvæmdir hefjist síðsumars á þessu ári. Það sem liggur undir er efnisgeymslan, ofnhúsið og allt þar á milli. Það stendur til að halda eftir skrifstofubyggingunni, pökkunarhúsinu, sementssílóunum við höfnina og strompurinn er inni eins og er, annað er að fara.“ Skipulagsvinnan við bæði Sementsreitinn og Dalbrautarreitinn hefur verið í gangi frá því á síðasta ári. Sigurður Páll segir þessa vinnu hafa tekið töluverðan tíma og að heilmikil vinna sé þar á bakvið. „Það er forgangsatriði hjá okkur að ljúka þessari skipulagsvinnu. Þessi skipulög munu klárast á nánast sama tíma, vonandi í kringum júlí eða ágúst.“

Margar tiltækar íbúðarhúsalóðir á Akranesi