Vilhjálmur Birgisson formaður Verkalýðsfélags Akraness fer vissulega ekki troðnar slóðir í starfi sínu og hefur sem slíkur markað sér sérstöðu meðal verkalýðsforkólfa hér á landi. Vilhjálmur notar samfélagsmiðla mikið og bloggar þar um sitthvað sem að hagsmunabaráttu fyrir launafólk snýr. Síðastliðinn föstudag skrifaði Vilhjálmur færslu á Facebook síðu sína sem vakið hefur viðbrögð, spurningar og jafnvel orsakað svefnlausar nætur meðal umboðsmanna hans; fólks úr röðum hinna vinnandi stétta. Hefur Vilhjálmi ítrekað verið bent á að véfréttir sem þessi séu ekki æskilegar. Færsla Vilhjálms er eftirfarandi:

„Í gærkveldi hrönnuðust upp óverðurský yfir Akranesi sem endaði með gríðarlegum þrumum og eldingum sem lýsti upp allan bæinn. Nú skal ég fúslega viðurkenna að ég óttast innilega að það séu að hrannast upp óveðurský í atvinnumálum okkar Akurnesinga og núna er bara spurnig hvort það endi með þrumum og eldingum.

Eitt er víst að ef áhyggjur mínar reynast á rökum reistar þá verður því svarað af fullri hörku og mikilvægt að við Skagamenn stöndum saman sem einn maður í þeirri baráttu að verja lífsviðurværi bæjarbúa.

En þetta skýrist allt á næsta mánudag hvort þessar áhyggjur mínar séu ástæðulausar eða ekki! Eitt er víst að Verkalýðsfélag Akraness mun verja atvinnuöryggi og lífviðurværi sinna félagsmanna með kjafi og klóm bara þannig að því sé til haga haldið.“

Sjái að sér..

Ekkert kemur fram um hvaða fyrirtæki á í hlut. Sem svar við fyrirspurn eins þeirra sem tjáir sig skrifar Vilhjálmur: „Ég er að vona að þeir sem eiga hlut að máli sjái að sér yfir helgina. Það er ástæðan fyrir því að ég segi svona frá þessu.“

Véfrétt Vilhjálms vekur ugg