Skallagrímur laut í lægra haldi gegn Val þegar liðin mættust í lokaleik Domino‘s deildar kvenna í körfuknattleik í gærkvöldi. Leikið var á Hlíðarenda í Reykjavík. Leikurinn skipti engu máli upp á stöðu liðanna í deildinni en var engu að síður jafn og spennandi framan af. Valskonur voru hins vegar sterkari í síðari hálfleik og sigruðu að lokum með tólf stigum, 83-71.

Valsliðið var heldur sterkara í upphafi leiks en Skallagrímskonur voru þó aldrei langt undan. Þær jöfnuðu í 14-14 seint í upphafsfjórðungnum og höfðu síðan tveggja stiga forskot að honum loknum, 21-23. Valur jafnaði snemma í öðrum leikhluta en Skallagrímur komst yfir á nýjan leik. Heimakonur settu þá þriggja stiga körfu og komust yfir og höfðu nauma forystu allt til loka fyrri hálfleiks. Þær leiddu með fjórum stigum í hléinu, 42-38.

Þriðji leikhluti var síðan eign Valskvenna. Þær slógu tóninn strax eftir hléið og léku afar vel allan leikhlutann. Mest komust þær 16 stigum yfir, í stöðunni 62-46 og þær leiddu með 13 stigum fyrir lokafjórðunginn, 64-51. Skallagrímskonur voru þó hvergi nærri hættar og reyndu hvað þær gátu til að komast aftur inn í leikinn. Þær náðu að minnka muninn í sjö stig undir lok leiks en nær komust þær ekki. Valur átti lokaorðið og hafði á endanum tólf stiga sigur, 83-71.

Tavelyn Tillman og Kristrún Sigurjónsdóttir skoruðu 24 stig hvor fyrir Skallagrím. Að auki tók Tavelyn átta fráköst og Kristrún fimm. Sigrún Sjöfn Ámundadóttir skoraði 15 stig og tók átta fráköst.

Eins og vitað var fyrir leikinn þá hafnar Skallagrímur í þriðja sæti deildarinnar og mætir Keflavík í undanúrslitum úrslitakeppninnar um Íslandsmeistaratitil kvenna. Er þetta í fyrsta sinn sem Skallagrímur keppir í úrslitakeppni kvenna og það sem nýliðar í deildinni. Fyrsti leikur viðureignar Skallagríms og Keflavíkur fer fram í Keflavík miðvikudaginn 29. mars næstkomandi. Það lið sem fyrr sigrar þrjá leiki tryggir sér sæti í úrslitaeinvíginu.

Tap hjá Skallagrími í lokaleiknum