Skessuhorn greindi frá því í nóvembermánuði að fyrirhuguð væri stækkun á húsnæði verslunarinnar Hólabúðar á Reykhólum. Búðin verður lengt um þrjá metra og svo breikkuð um 4,8 metra til austurs. Framkvæmdir hófust formlega í gær, þriðjudaginn 21. mars, þegar Brynjólfur Smárason verktaki mætti á gröfunni og byrjaði að grafa fyrir stækkuninni. „Reyndar var byrjað að smíða einingarnar í stækkunina í síðustu viku. Þær eru smíðaðar í áhaldahúsinu hérna við hliðina á okkur,“ segir Reynir Þór Róbertsson, sem rekur Hólabúð ásamt Ásu Fossdal eiginkonu sinni. „Þegar þær eru tilbúnar og lengingin á versluninni tilbúin, munum við færa þangað vörur af lagernum, sem nú er staðsettur hér austan megin við húsið. Þá verður hægt að hefjast handa við að grafa austanmegin, steypta sökkul og síðan geta einingarnar risið hver á fætur annarri,“ bætir hann við. „Þá getum við farið að opna veitingastað,“ segir Reynir ánægður, en gert er ráð fyrir veitingastað austan megin við núverandi húsnæði Hólabúðar. Til þess að það sé mögulegt þarf að færa lagerinn, eins og Reynir lýsti hér að ofan. Hann segir mikið fagnaðarefni að hægt verði að opna veitingastað á Reykhólum. „Það er mjög ánægjulegt og veitir ekki af því hér yfir sumartímann. Þetta er eitthvað sem vantar á Reykhóla,“ segir hann og bætir því við að þau hjónin hafi vonast til að geta bætt veitingasölu við reksturinn frá því þau opnuðu Hólabúðina fyrir rétt tæpum tveimur árum síðan. Þá hafði, sem kunnugt er, engin verslun verið á Reykhólum um þriggja mánaða skeið. „Þetta var alltaf stefnan og í upphafi ætluðum við að gefa okkur fimm ár til að opna veitingastað. En nú er þetta að gerast, þegar aðeins fimm daga vantar í að Hólabúð verði tveggja ára gömul,“ segir hann ánægður.

Hráefni úr héraði

Aðspurður segir Reynir að stefnt sé að því að hægt verði að ljúka framkvæmdum sem fyrst svo veitingasala geti hafist fyrir sumarið. Samhliða stækkuninni hyggjast Reynir og Ása einnig taka verslunina í gegn að innan, skipta út hillum og innréttingum. „Við stefnum að því að hér verði allt tilbúið í endann maí eða byrjun júní, þannig að við getum byrjað fyrir sumarið. Það er allt kapp lagt á það að ná háannatímanum,“ segir hann.

Reynir segir að stefnan sé að bjóða alltaf upp á hlaðborð í hádeginu og rétti af matseðli á kvöldin. „Það verður mikill metnaður lagður í kvöldverðarseðilinn og reynt að vera með sem flest hráefni úr héraði. Til dæmis verðum við með selkjöt, á þeim árstíma sem það er hægt. Eftir því sem við best vitum verðum við eini veitingastaðurinn á landinu sem mun bjóða upp á sel. Ærkjöt verður á matseðlinum og við munum nýta okkur sveppi úr Gufudalssveitinni, á þeim tíma sem það er hægt og síðan auðvitað berin sem eru hér allt í kringum okkur, skelfiskinn frá Króksfjarðarnesi og svo mætti lengi telja,“ segir hann. Eftirvæntingin leynir sér ekki í rödd Reynis, enda segir hann framundan töluverðar breytingar á rekstrinum. „Við munum spila þetta eftir eyranu fyrst um sinn en ég tel víst að við komum til með að þurfa að bæta við starfsfólki. Að opna veitignastað verður stór breyting fyrir okkur og á eftir að styrkja stoðir rekstursins til framtíðar,“ segir Reynir Þór Róbertsson að lokum.

Stækkun Hólabúðar á Reykhólum er hafin