Í gær var þrítugasti Flandraspretturinn hlaupinn í Borgarnesi og voru ýmis tímamót í hlaupinu að þessu sinni. Hlaupahópurinn Flandri stendur fyrir þessum fimm kílómetra keppnishlaupum þriðja fimmtudag í mánuði frá október til mars, alls sex sprettir á vetri. Í vetur er að ljúka fimmta hlaupatímabilinu. Fyrir nokkrum vikum fóru félagar í Flandra að ræða það sín á milli hvort þetta væri ekki rétti tíminn til að gera eitthvað fyrir Stefán Gíslason sem hefur verið aðalsprauta hlaupahópsins og límið í starfi hlauparanna. Tilefnið var að kappinn verður sextugur á morgun, 18. mars. Ákveðið var að nú skyldi verða slegið þátttökumet í Flandraspretti en fyrra met var 33 þátttakendur. Haft var samband við tengiliði í hlaupahópum á höfðuborgarsvæðinu, Akranesi, Hólmavík og víðar og fólk hvatt til að taka þátt. Í stuttu máli þá tókst þetta svo um munaði því 77 hlupu þennan þrítugasta Flandrasprett. Þar voru slegin fleiri met. Arnar Pétursson bætti eigið brautarmet frá árinu 2013 um 9 sekúndur, hljóp á 15:57 mín. Einnig setti Elísabet Líf A. Ólafsdóttir úr Fjölni brautarmet í flokki 18 ára og yngri, en hún hljóp á 23:56 mín, sem er tveggja mínútna bæting á fjögurra ára gömlu meti Irmu Jóngeirsdóttur. Elísabet er einungis 12 ára.

Eftir að allir voru komnir í mark í hlaupinu höfðu nokkrir félagar útbúið veitingar, hellt uppá kaffi og kakó og buðu fram aðrar veitingar. Sunginn var afmælissöngur fyrir „Stebbann“ og þar á eftir fór fram verðlaunaafhending. Einnig voru dregin út útdráttarverðlaun sem ýmsir aðilar höfðu gefið, meðal annars Kaupfélag Borgfirðinga, Nettó, Hótel Hamar, Búnaðarsamtök Vesturlands, Borgarsport, Landnámssetirð, Ok bistro, La Colina, Salka og Mýranaut. Flandrahópurinn vill koma á framfæri þakklæti til þessara stuðningsaðila.

Allir eru velkomnir í útgáfuhófið sem haldið verður á Kex Hostel á morgun klukkan 14:00.

Kom af fjöllum!

Afmælisveislan sem hlaupafélagar Stefáns buðu til í gærkvöldi í íþróttamiðstöðinni í Borgarnesi kom Stefáni í opna skjöldu. „Ég kom af fjöllum,“ sagði hann þegar blaðamaður heyrði í honum hljóðið í morgun. „Það er þá ekki í fyrsta skipti á liðnum árum sem ég geri það,“ bætir hann við léttur í bragði. Sjálfur segist hann ekki vera mikill efnishyggjumaður og fannst því afar vænt um að hlaupafélagar hans gæfu honum í afmælisgjöf að stuðla að metfjölda í þrítugasta Flandrahlauinu. Sextugsafmæli sínu fagnar Stefán hins vegar með því að bjóta til útgáfuteitis í tilefni bókar sem hann hefur skrifað og bókaforlagið Salka gefur nú út. „Já, það var þannig að í fimmtugs afmælisgjöf gaf ég mér að stefna að útgáfu bókar tíu árum síðar. Ég einsetti mér að hlaupa fimmtíu fáfarnar leiðir á næsta áratug, skrá ferðalýsingar og gefa síðan út bók á sextugsafmælinu um þessar hlaupa- eða gönguleiðir. Bókin Fjallavegahlaup er afraksturinn af því. Bókina kynni ég svo á Kex Hostel í Reykjavík klukkan 14 á morgun, á sjálfan afmælisdaginn 18. mars,“ segir Stefán.

Fjallvegahlaup – 50 leiðir

Fjallvegahlaup er 340 síðna bók eftir Stefán þar sem hann lýsir í máli, myndum og með kortum þessum 50 hlaupaleiðum sem hann hefur farið síðasta áratuginn. Flestir landshlutar koma við sögu en þó segir Stefán að síst á Suðurlandi megi finna fáfarnar hlaupaleiðir á fjöllum. „Þetta eru almennar leiðarlýsingar og gagnlegar upplýsingar sem ég hef skráð. Þegar ég varð fimmtugur setti ég mér þrjú markmið. Í fyrsta lagi að halda mér í formi á sextugsaldrinum og halda áfram að hlaupa. Í öðru lagi að vekja áhuga fleiri á útivist og gildi hollrar hreyfingar og í þriðja lagi vildi ég kynnast betur þessu fallega landi sem við eigum. Mér finnst að þessi markmið hafi öll gengið eftir og fyrir það er ég afar þakklátur nú á þessum tímamótum,“ segir Stefán.

Stefán segir að upphaflega hafi hann ætlað að fara þessar fimmtíu leiðir einn. „Björk [Jóhannsdóttir] konu minni fannst hins vegar ráðlegt að ég biði með mér fleirum þegar ég færi þessi fjallvegahlaup. Ég er dálítill einfari í mér en samþykkti þessa tillögu hennar og hlaupafélagar með mér í fjallvegaskokkinu hafa verið frá einum og upp í tuttugu hverju sinni. Alls hafa 111 manns hlaupið þessi fimmtíu hlaup með mér,“ segir Stefán.

Þátttökumet var ríflega tvöfaldað í þrítugasta Flandrasprettinum. Hér er hluti hópsins í anddyri Íþróttamiðstöðvarinnar í Borgarnesi. Ljósm. sjb

Flandrafólk kom hlaupagikknum og afmælisbarninu á óvart