Það verður líf og fjör í Laugardalshöllinni dagana 16. – 18. mars en nú er að hefjast, í fjórða sinn, Íslandsmót iðn- og verkgreina. Hátt í 200 ungmenni munu keppa um að hljóta nafnbótina Íslandsmeistari í 25 iðngreinum. Sigurvegarar eiga margir hverjir kost á að keppa síðan við þá bestu í sinni grein á Evrópumóti sem haldið verður í Búdapest 2018. Einnig verða þrjár iðngreinar til viðbótar með sýningu á sínu fagi.

25 skólar munu kynna fjölbreytt námsframboð á framhaldsskólastigi. Er þetta í annað sinn sem haldin er slík sameiginleg námskynning þar sem nemendur, kennarar og náms- og starfsráðgjafar munu svara spurningum um námsframboð, félagslíf, inntökuskilyrði og annað sem gestir vilja vita um nám og störf. Von er á um 7000 grunnskólanemendum í Laugardalshöllina fyrstu tvo dagana en þá munu nemendur í 9. og 10. bekk víðs vegar af landinu mæta til að fylgjast með þessu unga fólki keppa og og fá að prófa fjölbreytt verkefni undir handleiðslu fagfólks. Má þar nefna að líma upp flísar, nota air-brush á bíl, prófa hljóðhraðaskynjara, setjast upp í ýtuhermi og skipstjórnarhermi, prófa ýmis verkfæri, þvo og flétta hár, baka, helluleggja, sá kryddjurtum og fylgjast með róbotum leysa ýmsar þrautir.

Laugardaginn 18. mars verður Fjölskyldudagur. Frítt verður inn og fræðsla og fjör í boði.

„Markmiðið með þessari kynningu er m.a. að kynna fyrir ungu fólki þau fjölmörgu tækifæri sem felast í iðn- og verknámi og auðvelda þeim að kynna sér fjölbreytt námsframboð framhaldsskólanna með það fyrir augum að fleiri taki upplýsta ákvörðun um námsval sem tekur mið af áhugasviði þeirra og hæfni. Markvisst námsval dregur úr brotthvarfi úr námi sem er stórt vandamál hér á landi,“ segir í kynningu frá Verkiðn.

Íslandsmót iðn- og verkgreina hefst í dag