Þórdís Kolbrún R. Gylfadóttir ráðherra ferðamála hefur staðfest tillögu stjórnar Framkvæmdasjóðs ferðamannastaða um úthlutun styrkja vorið 2017. Alls eru veittir styrkir til 58 verkefna á landsvísu og nemur heildarfjárhæð þeirra 610 milljónum króna. Þar af renna tæplega 116 milljónir til 13 verkefna á Vesturlandi, eða sem nemur 19% af úthlutun sjóðsins. Að auki hefur ráðherra falið Ferðamálastofu að ganga til samninga við Vegagerðina um þróun á ölduspákerfi vegna Reynisfjöru og Kirkjufjöru þar sem ferðafólk hefur ítrekað farið sér að voða í ölduróti. Lagðar voru 20 milljónir af ráðstöfunarfé sjóðsins í það verkefni.

Hæsti styrkur sem sjóðurinn veitir að þessu sinni er 60 milljónir króna í verkefni í Landmannalaugum. Næsthæsta styrkinn á landsvísu hlýtur Snæfellsbær, 31,2 milljón, vegna verkefna í Rauðfeldargjá á Snæfellsnesi. Þá fær Akraneskaupstaður úthlutað 30 milljónum króna vegna Guðlaugar, vaðlaugar í grjótgarði á Jaðarsbökkum. Þriðji hæsti styrkurinn á Vesturlandi er til stækkunar bílastæða og annarra verkefna við Hraunfossa.

Þetta er sjötta árið sem Framkvæmdasjóður ferðamannastaða úthlutar styrkjum. Hlutverk sjóðsins er samkvæmt lögum að stuðla að uppbyggingu, viðhaldi og verndun ferðamannastaða í opinberri eigu eða umsjón um land allt, leitast við að tryggja öryggi ferðamanna og vernda náttúru landsins og fjölga viðkomustöðum ferðafólks til að draga úr álagi á fjölsótta ferðamannastaði.

Styrkir á Vesturland eru þessir:

Stykkishólmsbær. 12,82 milljónir til að ljúka göngustígagerð í Súgandisey.

Grundarfjarðarbær. 7 milljónir til að gera áningarstað við Kirkjufellsfoss. Styrkur til hönnunar bílastæðis og lagfæringar núverandi göngustíga.

Snæfellsbær. 31,19 milljónir króna til að bæta aðkomu, bílastæði og göngustíga við Rauðfeldargjá.

Svæðisgarðurinn Snæfellsnes. 2,84 milljónir króna til að endurhanna gamla félagsheimilið að Breiðabliki í Eyja- og Miklaholtshreppi til að gera það að gestastofu fyrir Svæðisgarðinn á Snæfellsnesi.

Dalabyggð. 3,07 milljónir króna til að leggja stíg með ströndinni við Búðardal (áfangi 2), gera á bílastæði og áningarstað við enda stígarins.

Akraneskaupstaður. 30 milljónir króna til að byggja heita laug, Guðlaug, sem staðsett verður í grjótvörn við Langasand á Akranesi. Mannvirkið samanstendur af útsýnispalli, heitri laug og grynnri laug sem nýtur vatns úr yfirfalli efri laugarinnar.

Hvalfjarðarsveit. 5,7 milljónir króna vegna áframhalds á endurbótum og viðhaldi gönguleiða upp að fossinum Glymi. Gönguleiðir við Glym eru brattar, hættulegar og viðkvæmar fyrir rofi.

Umhverfisstofnun fær 800 þúsund króna styrk til að endurheimta illa farin gróðursvæði með uppgræðslu, mosaflutningi, girðingum til að girða af viðkvæm svæði og merkingum við Grábrók.

Hreðavatn ehf. 3,27 milljóna króna styrkur til úrbóta vegna gróðurskemmda við Glanna og Paradísarlaut; lokun óæskilegra stíga, endurbóta á stígum, lagfæringar á gróðurskemmdum og uppsetningu merkinga og skilta.

Skógrækt ríkisins. 2,5 milljónir í lokafrágang útsýnispalls við Laxfoss í Norðurárdal, m.a. smíði stiga og millipalla niður á útsýnisstað ásamt lokafrágangi staðarins með því s.s. að klára malarstig, sá í kanta, loka gróðursárum og setja upp stikur og skilti.

Snorrastofa í Reykholti. 7,4 milljónir króna í eflingu minjasvæðis í Snorragarði í Reykholti. Styrkur til að loka skurðum, setja lokræsi, laga stíga og setja upp skilti.

Umhverfisstofnun. 22 milljónir í endurhönnun, stækkun og malbikun núverandi bílastæðis við Hraunfossa í Hálsasveit, þar sem núverandi bílastæði ber ekki þann þunga umferðar sem um það fer.

Reykhólarhreppur. 6,7 milljónir króna til frekari hönnunar, stíga- og áningarstaðagerð, öryggismerkingar og fleira neðan við þorpið á Reykhólum (Kúalaug).

Á Vesturland fara 116 milljónir til umhverfisverkefna