Á morgun lýkur söfnun á síðunni Kickstarter.com til framleiðslu á íslenskri teiknimynd í japönskum stíl. Byggir myndin á handriti eftir tæplega þrítugan Skagamann, Kristján Má Gunnarsson. Verkefnið verður jafnframt hið fyrsta sem alþjóðlega framleiðslufyrirtækið Rengo Studio safnar fyrir með þessum hætti. Söfnuninni á Kickstarter lýkur á morgun, miðvikudaginn 15. mars.

Framleiðsluheiti nýju teiknimyndarinnar er Paradise og byggir á smásögu Kristjáns Más sem nefnist Hvergiland. „Ég skrifaði smásögu og þýddi hana af rælni yfir á ensku fyrir nokkrum árum. Sagan er grunnurinn sem teiknimyndin um Paradise byggir á en handritið er engu að síður töluvert breytt. Ég vinn svo í gegnum netið og samskiptamiðla með tveimur framleiðendum úti, sem leikstýra jafnframt myndinni. Nú er stefnan að gera fjörutíu mínútna teiknimynd sem gefin verður út á opinni Youtube-rás. Þetta verður því nokkuð lengri teiknimynd en almennt er dreift ókeypis á Youtube, en algeng lengd þeirra er þetta sjö til níu mínútur.“ Aðspurður segir Kristján að undirbúningsvinnu vegna gerðar teiknimyndarinnar sé nú lokið en dýrasti hlutinn eftir, þ.e. sjálfar teikningarnar sem skapa teiknimyndina. Alls starfa sex manns við framleiðsluna og þar af eru þrír teiknarar. Rengo Studio hefur það markmið að skapa tækifæri fyrir unga listamenn á ýmsum sviðum til að stíga sín fyrstu skref í teiknimyndagerð. Ekki er reiknað með teljanlegum ágóða af sjálfri framleiðslu myndarinnar, en að útbreiðsla hennar gæti skapað tekjur þegar fram í sækir. Teiknimyndin verður í japönskum anime stíl en er engu að síður hugsuð fyrir vestrænan markað og verður talsett á ensku.

Fjórar háskólagráður líkt og Georg

Kristján Már er tæplega þrítugur að aldri, fæddur 1988, en hefur þrátt fyrir ungan aldur aflað sér talsverðrar menntunar. „Rétt eins og Georg Bjarnfreðarson er ég með fjórar háskólagráður. Þær eru í sagnfræði, ritlist, markaðsfræði og hagnýtri menningarmiðlun, en líkt og Georg á ég eftir að afla mér kennsluréttinda! Ég hætti í skóla í fyrra, varð stúdent frá Fjölbrautaskóla Vesturlands um jólin 2007 og var meira og minna í háskólanámi í átta ár þar á eftir.“ Nú starfar Kristján Már hjá Útgáfufélaginu Heimi. „Ég sel auglýsingar og vinn einnig við textagerð í nokkur af blöðunum sem Heimur gefur út, einkum Ský, Áningu og Iceland Review. Á þessu sviði er menntun mín og þekking að nýtast prýðilega,“ segir Kristján Már.

Gaf út bók 2015

Gert er ráð fyrir að myndin Paradise verði tilbúið í ágúst á þessu ári. „Maður veit í sjálfu sér ekkert meira en það. Nú stígur maður sem höfundur til hliðar og lætur aðra um að ljúka verkinu og vissulega er ég þegar orðinn talsvert spenntur.“ En handritið að Paradise er ekki fyrsta ritverk Kristjáns Más. „Ég skrifaði bók sem kom út fyrir tæpum tveimur árum. Hún hét Flóttinn til skýjanna og er furðusaga sem gerist í heimi þar sem rómverska heimsveldið féll ekki. Fjallar sagan um fólk sem situr fast í umsátri um borg og flýr með að festa gasbelg um tréskip.“ Kristján Már segist sáttur við sölu bókarinnar og er nú að vinna að skrifum á annarri bók í framaldi Flóttans til skýjanna.

Teiknimynd byggð á smásögu eftir ungan Skagamann