Forvarnahópurinn Brúin á Akranesi gengst í kvöld fyrir fyrirlestri í Tónbergi, sal Tónlistarskóla Akraness við Dalbraut 1, um kvíða barna og unglinga og aðferðir sem gagnast hafa til að draga úr slíku. „Við í Brúnni höfum haft nokkar áhyggjur af vaxandi kvíða barna og ungmenna sem virðist vera ört vaxandi vandamál. Foreldrar standa margir hverjir ráðþrota gagnvart þessu og hafa fá úrræði að leita í,“ segir í kynningu um fyrirlesturinn sem hefst klukkan 19:30 og stendur til 21:00.

Þrír fyrirlesarar munu koma fram. Fyrst munu þær Hrafnhildur Sigurðardóttir og Unnur Arna Jónsdóttir frá Hugarfrelsi kynna einfaldar og gagnlegar aðferðir sem foreldrar geta nýtt með börnum sínum til að auka vellíðan, hamingju og gleði. „Aðferðirnar hafa reynst börnum og unglingum vel til að koma auga á styrkleika sína, efla sjálfsmyndina og jákvæða hugsun. Aðferðirnar hjálpa þeim sem eiga erfitt með einbeitingu, svefn, eru kvíðin og óörugg. Erindi þeirra byggir á bókunum Hugarfrelsi – Aðferðir til að efla börn og unglinga, Hugarfrelsi – kennsluleiðbeininga og Siggi og Sigrún slaka á.

Þá mun Paola Cardenas sálfræðingur og fjölskylduþerapisti hjá Barnahúsi fara yfir kvíða og birtingarmynd hans hjá börnum og unglingum og hvaða atriði gott er að vera meðvitaður um þegar kvíðaeinkenni gera vart við sig. Paola hefur fengið sérhæfða þjálfun í viðtalstækni (Forensic Interviewing) og í notkun áfallamiðaðrar hugrænnar atferlismeðferðar (TF CBT). Í dag starfar hún sem sálfræðingur og sérhæfður rannsakandi í Barnahúsi þar sem hún vinnur með börnum og unglingum og fjölskyldum þeirra. Áður vann Paola hjá Heilbrigðisstofnun Suðurnesja sem yfirsálfræðingur teymis sem sinnir börnum og unglingum. Hún hefur einnig starfað á barna og unglingageðdeild Landspítalans og hjá Rauða kross Íslands.

Hrafnhildur og Unnur hafa undir nafninu Hugarfrelsi gefið út fjölbreytt efni til að bæta andlega og líkamlega líðan. Þær hafa einnig staðið fyrir fjölmörgum fyrirlestrum og námskeiðum fyrir börn, foreldra og fagfólk þar sem áhersla er lögð á sjálfsstyrkingu, öndun, slökun og hugleiðslu. Aðferðir Hugarfrelsis hafa verið innleiddar í fjölda leik-, grunn- og framhaldsskóla.

Um Brúna

Hér á Akranesi er starfræktur forvarnarhópur sem kallaður er Brúin. Brúin er formlegur samráðs- og og samstarfsvettvangur starfsmanna og stofnana sem koma að ýmsum málum sem tengjast börnum og unglingum í sveitarfélaginu. Brúin er skipuð verkefnisstjóra æskulýðs- og forvarnarmála, fulltrúa fjölskyldusviðs/barnaverndar, fulltrúa lögreglunnar, fulltrúa Brekkubæjarskóla, fulltrúa Grundaskóla, fulltrúa Arnardals og Hvíta hússins (félagsmiðstöðva). Auk þess eru fulltrúar skólaheilsugæslu og fulltrúi FVA í hópnum.

Fyrirlestrar í kvöld um kvíða barna og unglinga