Á fundi bæjarráðs Akraneskaupstaðar fimmtudaginn 2. mars síðastliðinn, var skipulags- og umhverfissviði bæjarins falið að finna lóð undir byggingu nýs búsetukjarna fyrir fólk með fötlun á Akranesi.

Búsetumál fólks með fötlun á Akranesi voru til umræðu í Skessuhorni í síðustu viku. Faðir manns sem býr að sambýlinu við Laugarbraut gagnrýndi bæjarfélagið fyrir að sambýlið væri ofsetið og að ekki hefði verið fundin lausn á búsetumálum þessa hóps til framtíðar. Sviðsstjóri velferðar- og mannréttindasviðs staðfesti í samtali við blaðið að sambýlið væri ofsetið, þar byggju sjö en húsnæðið væri ætlað sex íbúum. Sviðsstjóri sagði jafnframt frá því að bygging búsetukjarna væri í undirbúningi, en þá hafði hvorki verið ákveðið hvar sá búsetukjarni yrði staðsettur né hvenær hann verður byggður. Hins vegar, eins og sviðsstjóri greindi frá í síðustu viku, hafði starfshópur um byggingu búsetukjarna lagt til að kjarninn yrði tekinn í notkun fyrir árið 2019. Þær tillögur starfshópsins voru síðan teknar til umfjöllunar á áðurnefndum fundi bæjarráðs, sem samþykkti að láta finna búsetukjarnanum lóð á Akranesi. Jafnframt samþykkti ráðið að endurskoða fjárfestinga- og framkvæmdaáætlun fyrir árin 2017-2020 til að tryggja fjármögnun á nýjum búsetukjarna. Var skipulags- og umhverfisráði falið að gera tillögu þar að lútandi.

Á vef Akraneskaupstaðar er haft eftir Einari Brandssyni, formanni starfshóps um byggingu búsetukjarna fyrir fólk með fötlun, að næsta skref verði að taka ákvörðun um að bæjarfélagið byggi sjálft slíkan búsetukjarna og skipulags- og umhverfissviði falið að finna hentuga lóð fyrir íbúðirnar. Mikilvægt sé að vanda vel til verka og horfa til þess sem best gerist í þessum efnum á Íslandi.

Búsetukjarna verður fundin lóð