Borgarnes fagnar stórafmæli 22. mars næstkomandi. Þann dag verða liðin 150 ár frá því að Kristján IX Danakonungur undirritaði skjal þess efnis að Borgarnes hlyti stöðu sem löggiltur verslunarstaður. Skipuð hefur verið hátíðarnefnd til að halda utan um og skipuleggja hátíðarhöld á afmælisári. Í nefndinni sitja Björk Jóhannsdóttir, Guðrún Jónsdóttir, Guðveig Eyglóardóttir, Theódór Þórðarson og Theódóra Þorsteinsdóttir. Starfsmaður nefndarinnar er Anna Magnea Hreinsdóttir. Nefndin vinnur nú að því að undirbúa hátíðardagskrá sem fer fram að viðstöddum Guðna Th. Jóhannessyni, forseta Íslands.

Forseti Íslands tekur við Sögu Borgarness

Á afmælisdaginn sjálfan mun sveitarstjórn Borgarbyggðar minnast tímamótanna með hátíðarfundi í Kaupangi, elsta húsi Borgarness og hefst fundurinn klukkan 15. Klukkan 17 sama dag verður opnuð ljósmyndasýning í Safnahúsi Borgarfjarðar þar sem sýndar verða ljósmyndir fjögurra ljósmyndara frá ýmsum tímum í sögu Borgarness. Laugardaginn 29. apríl næstkomandi verður síðan haldið upp á afmælið með pompi og prakt í Hjálmakletti. „Þá verðum við með klassíska hátíðardagskrá. Við munum meðal annars afhenda forsetanum bækurnar um sögu Borgarness, sem hafa verið í smíðum í nokkur ár. Fyrra bindið heitir Byggðin við Brákarpoll og það síðara Bærinn við brúna. Höfundur verksins, Egill Ólafsson, féll frá í miðju verki og tók Heiðar Lind Hansson frændi hans við verkinu, ásamt fjölda sjálfboðaliða. Þeir hafa nú lokið þessu stóra verki en bækurnar eru 900 blaðsíður og í þeim eru mörg hundruð ljósmyndir. Opinber útgáfudagur verksins verður þennan dag,“ segir Björk Jóhannsdóttir formaður afmælisnefndarinnar í samtali við Skessuhorn.

Aðspurð um hvers vegna hátíðarhöldin verði rúmum mánuði eftir sjálfan afmælisdaginn segir hún að það hafi verið ákveðið í samráði við embætti forseta Íslands. „Við sendum forsetanum fyrst póst og nefndum miðvikudaginn 22. mars en þá kom í ljós að þá verður hann erlendis. Stuttu síðar sendi embættið póst og innti eftir því hvort forsetinn gæti tekið við sögu Borgarness við annað tækifæri. Hvort hægt væri að finna dagsetningu sem hentaði báðum, því hann langaði greinilega að taka við bókinni. Við urðum að vonum kát og þakklát, enda gefur nærvera forsetans hátíðinni mikið vægi,“ útskýrir Björk.

Tvískipt dagskrá

Að sögn Bjarkar verður dagskrá hátíðarinnar skipt í tvennt. Fyrri hlutinn verður tileinkaður nútímanum en sá síðari fyrri tíð. „Eftir að hátíðin verður sett munu leikskólabörn syngja íslenska afmælislagið og lagið „Í leikskóla er gaman“ en texti lagsins er saminn af konu í Borgarnesi. Því næst verða ræðuhöld og svo atriði sem tengist samstarfi grunnskólans og Safnahússins, þar sem grunnskólanemendur hafa samið lög við ljóð eftir fólk sem hefur átt heima í Borgarbyggð.“ Eftir kaffihlé hefst seinni hluti hátíðarinnar sem hefst á því að forsetinn tekur við eintaki af Sögu Borgarness. „Svo verður skotið inn söngatriðum, forsetinn flytur ávarp og Guðlaugur Þór Þórðarson utanríkisráðherra og Ingibjörg Hargrave munu minnast æsku sinnar í Borgarnesi. Að endingu verður atriði með kór eldri borgara,“ segir Björk.

Framtíðarsýn íbúa

Dagskrá hátíðarhaldanna er því að mestu fullmótuð. Nefndin hefur þó fengið fleiri hugmyndir sem tengjast afmælinu. „Við tókum þann pólinn í hæðina að senda fyrirtækjum og félagasamtökum bréf upp á að þau gætu minnst afmælisins með einhverjum hætti á sína vísu, einhvern tímann á árinu. Ég geri ráð fyrir því að til dæmis verslanir verði með eitthvað tengt afmælinu seinna á árinu, sérstaklega þar sem það er verið að fagna því að Borgarnes hefur verið löggiltur verslunarstaður í 150 ár,“ segir Björk. Þá segir hún jafnframt að auka fjárveitingar hafi verið settar í bæjarhátíðirnar Brákarhátíð og Sauðamessu og ættu hátíðirnar því að geta orðið veglegri en vanalegt er. Ein af þeim hugmyndum sem nefndin hefur fengið snýr að því að hægt verði að birta með einhverjum hætti þá sýn sem íbúar hafa á framtíð Borgarness. „Við opnuðum tengil þar sem fólk getur komið með hugmyndir um hvernig það sér bæinn sinn í framtíðinni. Þar geta íbúar komið með tillögur eða sagt frá þeirri framtíðarsýn sem það hefur, það má vera hvað sem er. Ef það koma góð svör væri svo gaman að birta þau uppi á vegg á afmælishátíðinni sjálfri,“ segir Björk. Til að taka þátt er hægt að fara inn á vefslóðina: http://borgarbyggd.is/kannanir/framtidarsyn-borgarnes150ara/

Afmælishátíðin verður haldin í Borgarnesi í apríl