Skallagrímur tók á móti Þór Þ. í næstsíðasta leik Domino‘s deildar karla í körfuknattleik í gærkvöldi. Skallagrímur þurfti á sigri að halda í leiknum og jafnframt að treysta á hagstæð úrslit í leik Stjörnunnar og Hauka til að eiga möguleika á að halda sæti sínu í deildinni, en Borgnesingar háðu harða baráttu við síðarnefnda liðið um áframhaldandi veru í deild þeirra bestu. En gæfan var Skallagrímsmönnum ekki vilholl í gær. Eftir hnífjafnan og spennuþrunginn leik sigu gestirnir fram úr á lokamínútunum. Þór sigraði með 95 stigum gegn 86 og Skallagrímsliðið fallið í 1. deild.

Mikið jafnræði var með liðunum í upphafi leiks. Aldrei munaði meira en fjórum stigum og liðin skiptust alls sjö sinnum á forystunni í fyrsta leikhluta. Að honum loknum leiddi Skallagrímur með einu stigi, 26-25. Borgnesingar héldu forystunni allt til hálfleiks en gestirnir voru aldrei langt undan. Mest munaði fimm stigum á liðunum um miðbik annars fjórðungs en aðeins tvö stig skildu liðin að í hléinu. Staðan í hálfleik var 45-43, Skallagrími í vil.

Spennan jókst enn þegar liðin mættu til síðari hálfleiks. Leikurinn var hnífjafn og liðin skiptust á að leiða. Varnarleikur var aðalsmerki þriðja leikhluta. Þegar komið var fram yfir hann miðjan skipti Skallagrímur yfir í svæðisvörn sem sló leikmenn Þórs rækilega út af laginu. Náðu Borgnesingar 9-0 spretti og sjö stiga fyrir vikið en gestirnir gátu ekki keypt sér körfu á þessum stutta kafla. Skallagrímsmenn hefðu ef til vill getað gert út um leikinn þarna í lok þriðja leikhluta en það átti ekki fyrir þeim að liggja. Þórsarar komu til baka en Skallagrímur leiddi með fjórum stigum fyrir lokafjórðunginn og andrúmsloftið rafmagnað í Fjósinu í Borgarnesi. Þór jafnaði snemma í fjórða leikhluta og mátti vart sjá á milli liðanna eftir það. Þegar leikhlutinn var rétt rúmlega hálfnaður var Skallagrímur yfir, 81-80. Borgnesingar áttu þrisvar möguleika á að auka forskot sitt en tókst ekki að gera sér mat úr þeim tækifærum. Heilladísirnar voru ekki með þeim í liði og þeim virtist fyrirmunað að sækja sér körfu. Vítaskot og tvær snöggar körfur gestanna komu þeim í sex stiga forystu, 81-86 þegar innan við mínúta var eftir. Þeir innsigluðu síðan sigurinn af vítalínunni og Skallagrímsmenn þurftu að bíta í það súra epli að falla úr deildinni, því á sama tíma sigruðu Haukar gegn Stjörnunni og Borgnesingar eiga því ekki möguleika á að halda sæti sínu í deildinni.

Enginn heimsendir

Flenard Whitfield var atkvæðamestur Skallagrímsmanna með 25 stig, 15 fráköst og fjögur varin skot. Sigtryggur Arnar Björnsson skoraði 22 stig, tók tíu fráköst og gaf sex stoðsendingar og Magnús Þór Gunnarsson lauk leik með tólf stig.

Skallagrímur mun ljúka leik í 11. og næstneðsta sæti Domino‘s deildarinnar þetta keppnistímabilið. Eftir leiki gærdagsins eru þeir tveimur stigum á eftir Haukum, en geta ekki farið upp fyrir þá jafnvel þó liðin endi með jafnmörg stig því Haukar er fyrir ofan Skallagrím á innbyrðis viðureignum.

Skemmtileg spilamennska og litríkir og öflugir stuðningsmenn hafa einkennt Skallagrím í Domino‘s deildinni í vetur og verður eftirsjá af bæði liði og stuðningsmönnum. Fall er hins vegar enginn heimsendir, Skallagrímsliðið er að stórum hluta skipað ungum, öflugum og efnilegum leikmönnum. Margir efnilegir hafa fengið tækifæri til að láta ljós sitt skína í vetur og staðið sig með stakri prýði. Munu Skallagrímsmenn án efa mæta með krafti upp í deild þeirra bestu á nýjan leik áður en langt um líður.

Síðasti leikur Skallagríms í vetur fer fram á fimmtudaginn, 9. mars næstkomandi, þegar Borgnesingar heimsækja Grindvíkinga.

: Litríkir og öflugir stuðningsmenn hafa einkennt Skallagrím í deildinni í vetur. Eftirsjá verður af bæði liðinu og stuðningsmönnum þess úr deild þeirra bestu. Ljósm. Skallagrímur/ Ómar Örn.

Skallagrímsmenn fallnir