Snæfell tók á móti Íslandsmeisturum KR í næstsíðustu umferð Domino‘s deildar karla í körfuknattleik í gærkvöldi. Gestirnir gátu með sigri í leiknum tryggt sér deildarmeistaratitilinn, sem þeir og gerðu. Eftir góða byrjun Snæfellinga tóku KR-ingar stjórn leiksins í sínar hendur og sigruðu að lokum örugglega, 67-87.

Snæfellingar fóru vel af stað gegn Íslandsmeisturunum og léku á als oddi í upphafi leiks. Þeir komust í 11-3 en þá var KR-ingum nóg boðið. Gestirnir svöruðu með 13-0 áhlaupi og komust í 16-11. Þeir leiddu með sex stigum eftir fyrsta leikhlutann, 13-19. Snæfellingar héldu vel í við gestina framan af öðrum fjórðungi en með snörpum kafla um miðjan leikhlutann náðu KR-ingar tíu stiga forskoti og þannig var munurinn í hálfleik. KR-ingar leiddu, 37-47.

Liðin áttu erfitt uppdráttar fyrst eftir hléið og þriðji leikhluti var hálfgert puð hjá leikmönnum beggja liða. Lítið var skorað, gestirnir skoruðu 16 stig gegn 13 stigum Snæfells og staðan fyrir lokafjórðunginn var 50-63 fyrir KR. Eftir að hafa elt um það bil tíu stiga forskot KR-inga meira og minna allan leikinn gáfu Snæfellingar örlítið eftir í fjórða og síðasta leikhluta. Þar skildu leiðir endanlega, KR-ingar voru komnir með 20 stiga forskot sem þeir héldu að kalla óbreyttu allt til loka leiksins. Fór svo að lokum að gestirnir fögnuðu sigri, 67-87. Þar með tryggði KR sér efsta sæti deildarinnar og þar með deildarmeistaratitil Domino‘s deildar karla í körfuknattleik 2017.

Christian Covile var atkvæðamestur leikmanna Snæfells með 26 stig og 16 fráköst. Andrée Fares Michelsson skoraði 13 stig og Árni Elmar Hrafnsson var með tíu.

Snæfell er sem fyrr á botni deildarinnar án stiga. Síðasti leikur Snæfells í vetur fer fram fimmtudaginn 9. mars næstkomandi þegar liðið heimsækir Þór Ak.

KR-ingar urðu deildarmeistarar í Hólminum