Íbúar í Berufirði á Austurlandi stefna að því að loka Hringveginum um fjörðinn eftir hádegi í dag til að mótmæla því að horfið verði frá uppbygginu nýs vegar yfir fjörðinn. Sú ákvörðun hefur vakið upp hörð viðbrögð. Í héraðsmiðlinum Austurfrétt er haft eftir Berlingdi Häsler á Karlsstöðum í Berufirði að þar í sveit sé fólk sótbrjálað yfir svikum ráðamanna. „Kosningabaráttan fjallaði mikið um þessa innviðauppbyggingu. Það átti að græja hana því það voru til svo miklir peningar. 72 dögum eftir að samgönguáætlun er samþykkt er allt svikið,“ segir Berglind. Fyrir nokkru var boðað til íbúafundar á Djúpavogi milli klukkan 11 og 13 í dag til að kynna sameiningarviðræður Djúpavogshrepps, Hornafjarðar og Skaftárhrepps. Til mótmælanna er boðað strax eftir þann fund. „Berfirðingar og allir sem vilja sýna samstöðu í þessu máli mæta í Berufjörðinn upp úr klukkan eitt [í dag]. Við ætlum að stöðva umferðina þar. Þetta er ákall til stjórnvalda um að endurskoða ákvörðunina og byrja framkvæmdir hið snarasta,“ segir Berlingd Häsler.

Vegur eins og í vanþróuðu ríki

Á fjárlögum fyrir árið 2017 vantaði tíu milljarða króna til að standa undir samgönguáætlun sem var samþykkt áður en þingi var slitið um miðjan október í aðdraganda kosninga. Einu kaflarnir sem enn eru ómalbikaðir á Hringveginum eru á Austurlandi og spilar Berufjörðurinn þar stórt hlutverk. Eftir margra ára deilur hyllti loks undir framkvæmdir. Vegurinn var á samgönguáætlun og allt tilbúið fyrir útboð. Þá tilkynnti samgönguráðherra að vegurinn um Berufjörð yrði meðal þeirra framkvæmda sem frestað yrði því ekki væri til nægt fjármagn. „Það hleypti illu blóði í heimafólk. Við búum á 21. öld við Hringveginn en vegurinn er eins og í vanþróuðu ríki. Þetta er ekki einkamál Berfirðinga heldur landsmanna allra.“

Bakland stjórnarliða ósátt

En íbúar í Berufirði eru ekki þeir einu sem sætta sig ekki við svikin kosningaloforð fjárveitingavaldsins á Alþingi. Sveitarstjórnarfólk víða um land hefur kvartað, svo sem hér á Vesturlandi. Þá er samkvæmt heimildum Skessuhorns bakland Sjálfstæðismanna í Norðvesturkjördæmi ævareitt yfir að horfið hefur verið frá ýmsum verkefnum sem ráðgerð höfðu verið í samgönguáætlun. Þar á meðal vegagerð um Uxahryggi, Skógarströnd. Teigsskóg í Gufudalssveit og undirbúning framkvæmda á Vesturlandsvegi um Kjalarnes.

Ætla að loka þjóðveginum um Berufjörð í dag