Skallagrímur tók á móti Tindastóli í jöfnum og spennandi leik í Domino‘s deild karla í körfuknattleik í gær. Skallagrímur leiddi stóran hluta leiksins en aldrei skildu meira en sjö stig liðin. Sjö stigum munaði einmitt á liðunum þegar flautað var til leiksloka, en þá voru það gestirnir frá Sauðárkróki sem leiddu. Lokatölur í Borgarnesi urðu 81-88, Tindastóli í vil.

Jafnt var á öllum tölum í upphafi leiksins en þegar komið var fram yfir miðjan fyrsta fjórðung náðu Skallagrímsmenn forystunni. Þeir leiddu með þremur stigum eftir fyrstu tíu mínúturnar, 26-23. Annar leikhluti var eins jafn og sá fyrsti. Skallagrímsmenn leiddu en leikmenn Tindastóls fylgdu þeim eins og skugginn. Þeir náðu hins vegar aldrei forystunni og Borgnesingar leiddu í hálfleik, 50-44.

Skallagrímsmenn komu ákveðnir til síðari hálfleiks og stjórnuðu ferðinni framan af þriðja leikhluta. Þeir náðu mest sjö stiga forskoti en eftir það tóku gestirnir smá rispu og minnkuðu muninn í þrjú stig áður en leikhlutinn var úti, 65-62. Upphófst þá spennandi lokafjórðungur. Gestirnir þjörmuðu að gestunum í upphafi fjórða leikhluta en Borgnesingar voru ekki á því að gefa eftir og vörðu naumt forskot sitt með kjafti og klóm. En með nokkrum góðum sóknum komust Stólarnir fjórum stigum yfir þegar fimm mínútur voru eftir og skyndilega höfðu þeir undirtök leiksins. Skallagrímsmenn gáfu ekkert eftir og jöfnuðu í 77-77 þegar tvær mínútur lifðu leiks, spennan í hámarki, og sigurinn virtist geta dottið hvorum megin sem er. Skallagrímsmönnum gekk illa að koma boltanum ofan í á lokamínútunum. Gestirnir voru yfirvegaðari í sínum aðgerðum og því var það Tindastóll sem tryggði sér sigurinn á elleftu stundu, 81-88.

Flenard Whitfield var atkvæðamestur Skallagrímsmanna með 25 stig og fimm fráköst. Sigtryggur Arnar Björsson skoraði 21 stig, tók fimm fráköst og gaf fimm stoðsendingar. Darrel Flake var með 15 stig og átta fráköst og Eyjólfur Ásberg Halldórsson skoraði tíu stig.

Skallagrímur hefur 14 stig í 10. sæti deildarinnar, tveimur stigum á undan liði Hauka í sætinu fyrir neðan en hefur leikið einum leik fleira þegar þessi orð eru rituð. Fjögur stig eru í liðin fyrir ofan sem deila 8. og 9. sætinu.

Næst leikur Skallagrímur á sunnudaginn, 5. mars, þegar liðið mætir Þór frá Þorlákshöfn. Sá leikur fer fram í Borgarnesi.

Urðu að játa sig sigraða í spennandi leik