ÍA og Valur mættust í Val í 1. deild karla í körfuknattleik í gærkvöldi. Leikið var á Akranesi. Eftir nokkuð jafnan fyrri hálfleik stungu gestirnir af í þeim síðari og unnu að lokum stórsigur, 70-98.

Mikið jafnræði var með liðunum í upphafsfjórðungnum. Valsmenn náðu smá rispu og sex stiga forystu seint í eikhlutanum en Skagamenn svöruðu í sömu mynt og munurinn var aðeins tvö stig þegar leikhlutinn var úti. Valur leiddi, 21-23. ÍA komst yfir snemma í öðrum fjórðungi en gestirnir voru ekki langt undan. Þeir minnkuðu muninn í eitt stig þegar skammt var til hálfleiks en Skagamenn áttu lokaorðið og höfðu fimm stiga forskot í hléinu, 42-37.

En eftir hléið fór að halla undan fæti hjá Skagamönnum. Valsmenn jöfnuðu snemma í síðari hálfleik og komust yfir. Þegar þriðji leikhluti var um það bil hálfnaður settu gestirnir allt í botn og náðu skömmu síðar 16 stiga forskoti. Skagamenn spyrntu við fótum og minnkuðu muninn í tólf stig, 56-68, áður en leikhlutinn var úti en það dugði skammt. Valsmenn tóku endanlega yfir leikinn í lokafjórðungnum, bættu hverju stiginu á fætur öðru við forskot sitt og unnu að lokum stórsigur, 70-98.

Derek Shouse var atkvæðamestur Skagamanna með 22 stig, sjö fráköst og sjö stoðsendingar. Björn Steinar Brynjólfsson skoraði tólf stig og tók fimm fráköst og Sigurður Rúnar Sigurðsson var með ellefu stig og fimm fráköst.

Skagamenn sitja eftir leikinn í 8. sæti deildarinnar með 12 stig, tveimur stigum á eftir FSu í sætinu fyrir ofan en eiga leik til góða á Selfyssinga. Ármenningar verma hins vegar botnsætið, stigalausir.

Næsti leikur ÍA fer fram á mánudagskvöld, 6. mars næstkomandi. Þá mæta Skagamenn liði Breiðabliks í Kópavogi.

Gestirnir stungu af í síðari hálfleik