Topplið Snæfells heimsótti Val í Domino‘s deild kvenna í körfuknattleik í gær. Eftir kaflaskiptan fyrri hálfleik tók við spennandi síðari hálfleikur og úrslit leiksins réðust síðan ekki fyrr en eftir framlengingu. Snæfell hafði betur, 70-77.

Snæfell hafði yfirhöndina í upphafi leiks og komst í 8-15 skömmu eftir miðjan fyrsta leikhluta. Valur rétti hlut sinn áður en fyrsti leikhluti var úti og jafnaði í 21-21. Jafnræði var með liðunum framan af öðrum fjórðungi. Valur náði síðan fimm stiga forskoti um hann miðjan, áður en Snæfell svaraði og komst tveimur stigum yfir. Valskonur áttu hins vegar lokaorðið í fyrri hálfleik og leiddu með fimm stigum í hléinu, 35-30.

Þriðji leikhluti var eign Valsliðsins sem hélt uppteknum hætti frá því undir lok fyrri hálfleiks. Þær náðu ellefu stiga forskoti um miðjan leikhlutann og höfðu sjö stiga forskot fyrir lokafjórðunginn, 55-48. Í upphafi fjórða leikhluta misstu Valskonur Miu Lloyd, besta leikmann liðsins, af velli með sína fimmtu villu. Snæfellskonur hófu þegar að saxa á forskot Vals og komust stigi yfir þegar leikhlutinn var hálfnaður og lokamínúturnar voru jafnar og spennandi. Næstu mínúturnar fylgdust liðin að í sínum aðgerðum. Valur komst stigi yfir þegar rúm mínúta var eftir en Snæfellskonur jöfnuðu úr víti þegar innan við hálf mínúta lifði leiks. Valskonur fengu síðan gullið tækifæri til að tryggja sér sigurinn en brenndu af sniðskoti með fjórar sekúndur á klukkunni og því varð að framlengja.

Snæfell gerði síðan út um leikinn í framlengingunni. Þær skelltu í lás í vörninni og gerðu Valskonum erfitt fyrir. Heimaliði skoraði aðeins fjögur stig í viðbótartímanum á móti ellefu stigum Snæfells sem sótti sigurinn á lokametrunum. Lokatölur urðu 70-77, Snæfelli í vil.

Aaryn Ellenberg fór mikinn í liði Snæfells með 36 stig, tólf fráköst og sex stoðsendingar. María Björnsdóttir var með tíu stig og átta fráköst og Berglind Gunnarsdóttir skoraði átta stig, tók fimm fráköst og stal boltanum fimm sinnum.

Snæfell trónir sem fyrr á toppi Domino‘s deildar kvenna og hefur liðið 38 stig eftir 24 leiki. Næsti leikur liðsins fer fram á miðvikudaginn þegar þær sækja Hauka heim að Ásvöllum í Hafnarfirði.

Snæfell skellti í lás í framlengingunni