Skallagrímur mætti botnliði Grindavíkur í Domino‘s deild kvenna í körfuknattleik í gær. Liðin mættust í Borgarnesi og leikurinn var einstefna frá fyrstu mínútu. Skallagrímskonur fóru á kostum og unnu stórsigur, 119-77. Er þetta stigahæsti leikur liðs í úrvalsdeild kvenna í rúman ára tug. Fleiri stig hefur lið ekki skorað síðan Haukar skoruðu 121 stig gegn Breiðabliki 17. janúar árið 2007.

Skallagrímskonur byrjuðu leikinn í gær af miklum krafti og skoruðu hvorki fleiri né færri en 39 stig í fyrsta leikhluta gegn aðeins 12 stigum gestanna. Þá þegar var ljóst að stefndi í stórsigur Skallagríms. Tavelyn Tillman var í miklu stuði í upphafi leiks, skoraði 21 stig í upphafsfjórðungnum einum og sér.

Gestirnir frá Grindavík náðu aðeins að svara fyrir sig í öðrum leikhluta. Þær klóruðu í bakkann og minnkuðu muninn í 21 stig áður en flautað var til hálfleiks. Borgnesingar leiddu með afgerandi hætti í hálfleik, 61-40.

Skallagrímskonur settu aftur í fluggírinn í þriðja leikhluta en gestirnir áttu erfitt uppdráttar. Þær skoraði 36 stig gegn 14 í leikhlutanum og höfðu 43 stiga forskot fyrir lokafjórðunginn, 97-54 og úrslit leiksins löngu ráðin.

Í fjórða og síðasta leikhlutanum slökuðu Skallagrímskonur aðeins á varnarlega og ungir og efnilegir leikmenn fengu nokkrar mínútur til að sína hvað í þeim býr. Leiknum lauk með 42 stiga stórsigri Skallagríms, 119-77.

Tvær þrennur

Það var yfirvinna á þrennuvaktinni í gærkvöld því Sigrún Sjöfn Ámundadóttir og Tavelyn Tillman náðu báðar þrennu gegn Grindavík. Afar sjaldgæft er að tveir leikmenn í sama liðinu nái þrennu í sama leiknum. Tavelyn skoraði 32 stig, tók 13 fráköst og gaf ellefu stoðsendingar. Sigrún skoraði 24 stig, tók ellefu fráköst og gaf tíu stoðsendingar.

Kristrún Sigurjónsdóttir skoraði 19 stig, tók fimm fráköst og gaf fimm stoðsendingar, Fanney Lind Thomas var með 15 stig og fimm fráköst og Jóhanna Björk Sveinsdóttir 14 stig og 13 fráköst.

Eftir leikinn í gær eru Skallagrímskonur enn í 3. sæti deildarinnar. Þær hafa 36 stig eftir 24 leiki, jafn mörg og Keflavík í sætinu fyrir ofan en tveimur stigum færra en topplið Snæfells. Skallagrímur og Keflavík mætast í stórleik 25. umferðar miðvikudaginn 8. mars næstkomandi. Sá leikur fer fram í Keflavík.

: Sigrún Sjöfn Ámundadóttir skilaði þrennu gegn Grindavík rétt eins og Tavelyn Tillman. Afar sjaldgæft er að tveir leikmenn í sama liði nái þrennu í sama leiknum. Ljósm. Skallagrímur/ Ómar Örn.

Flest stig liðs í áratug