Skagamenn léku tvívegis í 1. deild karla í körfuknattleik um liðna helgi. Á föstudaginn tóku þeir á móti liði Vestra og máttu sætta sig við tap. Nokkuð jafnræði var með liðunum í upphafi leiks. ÍA byrjaði betur en gestirnir létu ekki bíða lengi eftir sér og komust yfir snemma leiks. Skagamenn náðu forskotinu á nýjan leik um miðjan fyrsta leikhluta en eftir það var Vestri sterkara lið vallarins. Gestirnir náðu forystunni að nýju og létu hana aldrei af hendi það sem eftir lifði leiks. Skagamenn voru aldrei langt undan, náðu að jafna snemma í öðrum fjórðungi en Vestramenn kláruðu fyrri hálfleikinn af krafti og leiddu með átta stigum í hléinu, 31-38.

Jafnt var á með liðunum eftir hléið en eftir því sem leið á fóru Skagamenn að færast nær og nær gestunum. Þeir minnkuðu muninn í fjögur stig áður en þriðji leikhluti var úti og niður í tvö stig þegar fimm mínútur lifðu leiks. Nær komust þeir hins vegar ekki. Gestirnir svöruðu fyrir sig og luku leik með prýðilegum lokakafla. Skilaði það þeim níu stiga sigri, 67-76.

Derek Shouse var stigahæstur Skagamanna með 20 stig en gaf að auki átta stoðsendingar og tók sex fráköst. Næstur honum kom Björn Steinar Brynjólfsson með 14 stig, fimm fráköst og fimm stoðsendingar, þá Jón Orri Kristjánsson með ellefu stig og tólf fráköst og Áskell Jónsson lauk leik með tíu stig.

Sigruðu botnliðið auðveldlega

Skagamenn léku síðan aftur á sunnudag þegar þeir heimsóttu botnlið Ármanns og fóru með nokkuð þægilegan sigur af hólmi. Leikurinn var ekki jafn nema rétt fyrstu mínúturnar. Um miðjan upphafsfjórðunginn fóru Skagamenn að bæta í og voru stungnir af þegar leikhlutinn var úti. Þá leiddi ÍA með 33 stigum gegn 13 og höfðu þeir nokkuð afgerandi forskot meira og minna til leiksloka. Ármenningar voru sprækir á lokamínútum fyrri hálfleiks og tókst að minnka muninn í ellefu stig fyrir hléið, 41-52 en það var allt og sumt. Skagamenn voru mun sterkari eftir hléið líka. Þeir tóku aftur mikinn sprett undir lok þriðja leikhluta og náðu 26 stiga forskoti, 53-76. Heimamenn gerðu sig aldrei líklega til að minnka forystu ÍA neitt að ráði, þeir náðu rétt að kroppa nokkur stig af á lokamínútum leiksins. Fór svo að lokum að ÍA vann botnliðið með afgerandi hætti, 77-96.

Sex leikmenn ÍA náðu tveggja stiga tölu á stigatöflunni og ber það vott um góðan leik liðsins. Derek Shouse var stigahæstur með 19 stig, en hann tók að auki ellefu fráköst og gaf sex stoðsendingar. Ármann Örn Vilbergsson var með 17 stig, Sindri Leví Ingason 15, Andri Jökulsson 14, Sigurður Rúnar Sigurðsson tólf stig og Björn Steinar Brynjólfsson var með tíu stig og níu fráköst.

Eftir þessa tvo leiki helgarinnar sitja Skagamenn enn í 8. og næstneðsta sæti deildarinnar með tólf stig eftir 21 leik. Þeir eru tveimur stigum á eftir FSu í sætinu fyrir ofan en langt á undan stigalausum Ármenningum á botni deildarinnar.

Næsti leikur ÍA fer fram fimmtudaginn 2. mars næstkomandi þegar liðið mætir Val. Sá leikur fer fram á Akranesi.

Sigur og tap hjá ÍA um helgina