Snæfell situr sem fastast á toppi Domino‘s deildar kvenna í körfuknattleik eftir auðveldan sigur á Njarðvík á miðvikudag. Liðin mættust í Stykkishólmi og Snæfell einfaldlega rúllaði gestunum upp. Lokatölur urðu 82-55, Snæfelli í vil.

Njarðvíkurliðið hafði heldur yfirhöndina í upphafi leiks og komst í 5-11 seint í fyrsta leikhluta. Þá breyttu Snæfellskonur um takt í vörninni, mættu gestunum með hápressu og skoruðu næstu tólf stig leiksins og komust sex stigum yfir. Gestirnir skoruðu síðustu stig upphafsfjórðungsins og minnkuðu muninn í þrjú stig, 18-15. Algjör þáttaskil urðu í leiknum í öðrum fjórðungi. Snæfell hélt áfram að pressa hátt og hittu vel úr skotum sínum. Á sama tíma áttu gestirnir ekki sjö dagana sæla. Njarðvík skoraði aðeins sex stig til hálfleiks á meðan Snæfellskonur stungu af. Þær leiddu með 23 stigum í hléinu, 44-21 og voru komnar í ansi vænlega stöðu.

Áfram áttu gestirnir erfitt uppdráttar fyrst eftir hléið. Þær skoruðu aðeins átta stig í þriðja leikhluta og Snæfellsliðið, sem þó bauð ekki upp á neina flugeldasýningu í leikhlutanum, seig enn lengra fram úr. Fyrir lokafjórðunginn var staðan 62-29 fyrir Snæfelli og aðeins formsatriði að klára leikinn. Gestirnir áttu ágætis leik í lokafjórðungnum en það breytti engu fyrir úrslit leiksins. Snæfell hafði að lokum stórsigur, 82-55.

Sökum þess hve ójafn leikurinn var lengst af nýttu þjálfararnir tækifærið til að leyfa ungum og efnilegum leikmönnum að spreyta sig. Varð það til þess að allir leikmenn beggja liða tóku þátt í leiknum á miðvikudag og aðeins tveimur leikmönnum tókst ekki að skora stig. Í liði Snæfells var Aaryn Ellenberg atkvæðamest með 15 stig og sex fráköst. Berglind Gunnarsdóttir var með tíu stig, sex fráköst og fimm stoðsendingar og Rebekka Rán Karlsdóttir var einnig með tíu stig.

Sem fyrr segir trónir Snæfell eitt á toppi Domino‘s deildar kvenna með 36 stig eftir 23 leiki, tveimur stigum á undan Skallagrími og Keflavík sem eru jöfn að stigum í 2. og 3. sæti.

Næsti leikur Snæfells fer fram miðvikudaginn 1. mars næstkomandi þegar liðið heimsækir Val.

Snæfell fór létt með Njarðvík