Botnlið Snæfells mætti Grindvíkingum í Domino‘s deild karla í körfuknattleik í gær. Leikið var í Stykkishólmi. Ingi Þór Steinþórsson, þjálfari Snæfells, mátti horfa á leikinn úr stúkunni en hann tók út leikbann sem hann fékk í Vesturlandsslagnum gegn Skallagrími í síðustu umferð. Eftir að hafa leitt fyrstu þrjá leikhlutana misstu Snæfellingar forskotið í hendur gestanna sem létu hana aldrei af hendi. Grindvíkingar stálu sigrinum og höfðu betur, 80-88.

Snæfellingar byrjuðu af miklum krafti og réði gangi leiksins framan af. Þeir náðu 17 stiga forskoti um miðjan fyrsta leikhluta en leiddu með 13 stigum að honum loknum, 31-18. Snæfellingar voru áfram sterkari framan af öðrum leikhluta. Þeir náðu mest 16 stiga forskoti en um miðjan leikhlutann hófst prýðilegur leikkafli gestanna og þeir minnkuðu muninn í sex stig fyrir hléið. Staðan í hálfleik var 47-41, Snæfelli í vil.

Grindvíkingar byrjuðu síðari hálfleikinn af miklum krafti og jöfnuðu í 47-47 en Snæfellingar stóðust áhlaupið og sneru vörn í sókn. Þeir náðu tíu stiga forystu áður en gestirnir minnkuðu muninn í tvö stig fyrir lokafjórðunginn. Það var þar sem þáttaskil urðu í leiknum. Þrautseigja Grindvíkinga bar loks ávöxt því þeir komust yfir snemma í fjórða leikhluta. Þeir þéttu vörnina og gerðu Snæfellingum erfitt fyrir. Gestirnir sigu fram úr eftir því sem leið á og baráttuglaðir Snæfellingar máttu sitja eftir með sárt ennið. Lokakafli Grindvíkinga skilaði þeim sigrinum. Lokatölur í Stykkishólmi urðu 80-88, gestunum í vil.

Árni Elmar Hrafnsson og Christian Covile fóru mikinn í liði Snæfells. Árni skoraði 28 stig og tók tíu fráköst en Christian lauk leik með 25 stig og ellefu fráköst.

Snæfell er sem fyrr án stiga á botni deildarinnar og er fallið, eins og áður hefur komið fram, 14 stigum frá öruggu sæti í deildinni.

Næsti leikur Snæfells fer fram föstudaginn 3. mars næstkomandi, þegar liðið heimsækir Hauka, sem sitja í sætinu fyrir ofan með tólf stig og berjast fyrir sæti sínu í deildinni.

Misstu sigurinn úr greipum sér