Helga Dögg Lárusdóttir og Sólveig María Arnórsdóttir eru meðal þeirra kvenna sem eru í iðnnámi við Fjölbrautaskóla Vesturlands. Þær eru báðar á sinni fjórðu og jafnframt síðustu önn í grunnnámi málmiðngreina. Þeim líkar námið vel, segja það fjölbreytt og skemmtilegt. „Ég var búin að ákveða að læra þetta þegar ég var enn í grunnskóla. Mig langaði að prófa eitthvað annað en þetta venjulega bóklega nám. En svo er líka helmingurinn af fjölskyldunni í einhverju svona,“ segir Sólveig María. Helga Dögg segist alltaf hafa haft þennan valmöguleika í huga þegar hún var að velta fyrir sér námi. „Ég kláraði tvær annir á félagsfræðibraut og ákvað svo að skipta. Ég kann mjög vel við mig hér,“ segir hún. „Ég er alin upp við þetta og finnst þetta spennandi,“ bætir hún við. Þær segja námið henta stelpum jafn vel og strákum. Engu að síður eru þær einu stúlkurnar í hópnum á móti níu strákum. „Svo eru tvær stelpur í hópnum sem eru á annarri önn. En hópurinn á undan okkur var samt með jöfn skipti lengi vel,“ segja þær.

Aðspurðar um hvað sé skemmtilegast við námið segir Helga Dögg að sér þyki kostur hvað námið er fjölbreytt. „Maður er alltaf að læra eitthvað nýtt og aldrei að gera það sama,“ segir hún. „Og að læra að verða sjálfstæður og geta bjargað sér sjálfur ef maður lendir í veseni,“ bætir Sólveig við. Þær hafa ekki alveg ákveðið hvað tekur við að loknu grunnnáminu en stefna báðar á áframhaldandi nám í faginu, líklega í vélvirkjun sem þær eru sammála um að sé góður grunnur. „Eftir það er hægt að fara í ýmiskonar störf,“ segir Sólveig. „Ég veit ekki alveg hvað tekur við hjá mér. Ég held að ég stefni að því að klára vélvirkjann og kannski fara svo í stálsmiðinn,“ segir Helga Dögg.

Stelpurnar eru sammála um að fólk verði hissa þegar það heyrir hvað þær eru að læra. „Maður finnur alveg fyrir því en þetta eru jákvæð viðbrögð. Fólk verður mjög hissa en finnst þetta flott, verður hissa á jákvæðan hátt. En við mælum með því að stelpur prófi þetta. Kvenfólki er tekið með opnum örmum á vinnumarkaði,“ segja þær að endingu.

Minnt er á opið hús í Fjölbrautaskóla Vesturlands næstkomandi mánudag þar sem hægt verður að fræðast um ýmsar námsleiðir sem eru í boði í skólanum.

Iðnnám er líka fyrir stelpur