Andlát – Georg Breiðfjörð Ólafsson

Georg Breiðfjörð Ólafsson, sem var elsti Íslendingurinn, lést miðvikudaginn 22. febrúar á Dvalarheimili Stykkishólms. Georg varð jafnframt elstur karla hér á landi. Hann var fæddur 26. mars 1909 og vantaði því tæpan mánuð upp á það að verða 108 ára.

Georg var fæddur og uppalinn í Akureyjum við Skarðsströnd í Dalasýslu. Foreldrar hans voru hjónin Ólafur Magnús Sturlaugsson og Ágústa Sigurðardóttir. Árið 1927 keyptu foreldrar Georgs jörðina Ögur við Stykkishólm og bjó fjölskyldan þar til ársins 1940 er hún flutti til Stykkishólms og átti Georg heima þar síðan. Georg var smiður að iðn og vann við húsbyggingar í Stykkishólmi og nágrannahéruðum og stundaði ennfremur skipasmíðar um áratugi. Síðast vann hann í skipasmíðastöðinni Skipavík. Hann var eftirsóttur til vinnu og þótti afar laghentur.

Eiginkona Georgs var Þorbjörg E. Júlíusdóttir frá Bjarneyjum á Breiðafirði, seinna Geirmundarstöðum á Skarðsströnd. Eignuðust þau hjónin þrjá syni. Barnabörnin eru fjögur og barnabarnabörnin tvö.

Georg þakkaði langlífi sitt ekki mataræði. Hann borðaði allan venjulegan mat, bæði saltaðan, súran og hertan, fisk, sel, lambakjöt, sjófugl, egg og annað sem var í boði, fremur lítið af grænmeti en mikinn sykur. Georg varð heiðursborgari Stykkishólms fyrir nokkrum árum.

Líkar þetta

Fleiri fréttir