Síðastliðið vor tilkynntu Faxaflóahafnir sf. að von væri á fyrstu skipakomu skemmtiferðaskips til Akraness sumarið 2017. Fyrsta skipið til að boða komu sína var skemmtiferðaskipið Le Boreal. Það mun koma 30. júlí í sumar og hafa viðdvöl við aðalhafnargarðinn. Le Boreal var smíðað árið 2010 og er 10,944 brúttótonn. Það er 142 m. á lengd, breidd er 18 m. og djúpristan er 4,8 m. Skipið getur tekið 264 farþega og í áhöfn eru 139.

Í dag fengu síðan Faxaflóahafnir sf. bókun upp á 14 skipakomur til Akraness frá skemmtiferðaskipinu To Callisto. Skipið var smíðað árið 1963 og er 430 brúttótonn. Skipið er 50 m. á lengd, breidd er 8 m. og djúpristan er 3.80 m. Skipið getur tekið 34 farþega og áhöfnin er í kringum 16-18 manns. Áætlað er að skipið muni hafa viðdvöl við bátabryggju á Akranesi í sumar. To Callisto mun koma þrisvar sinnum í júní, fyrst 12. júní, fjórum sinnum í júlí, fimm sinnum í ágúst og tvisvar í september. To Callisto verður jafnframt fyrsta skemmtiferðaskipið sem kemur á Akranes.

To Callisto

Tvö skemmtiferðaskip hafa boðað komu sína til Akraness í sumar