Eins og áður hefur verið greint frá í Skessuhorni var úthlutað úr Fjarskiptasjóði í byrjun febrúar. Þau sveitarfélög á starfssvæði Skessuhorns sem eiga kost á styrk til ljósleiðaravæðingar eru Akraneskaupstaður, Dalabyggð, Grundarfjarðarbær, Snæfellsbær, Skorradalshreppur og Reykhólahreppur.

Málið er þar með inni á borði kjörinna fulltrúa í þessum sveitarfélögum. Í nokkrum sveitarfélögum hefur styrkveiting úr Fjarskiptasjóði verið tekin til umfjöllunar. Þannig samþykkti bæjarstjórn Snæfellsbæjar nýverið að þiggja þann styrk sem sveitarfélaginu stendur til boða, sem og hreppsnefnd Skorradalshrepps. Þá hefur sveitarstjórn Borgarbyggðar samþykkt fyrir sitt leyti að ganga að úthlutun Fjarskiptasjóðs, en umsókn Skorradalshrepp innihélt einnig nokkra bæi í Andakíl sem heyra undir Borgarbyggð.

Sveitarstjórnir Dalabyggðar og Reykhólahrepps hafa einnig samþykkt að ganga til samninga við Fjarskiptasjóð og þiggja styrk til ljósleiðaravæðingar, sem og sérstakan byggðastyrk úr Fjarskiptasjóði sem báðum þessum sveitarfélögum stóð til boða vegna fyrirhugaðrar ljósleiðaravæðingar.

Styrkirnir sem sveitarfélögin hafa ákveðið að þiggja eru eftirfarandi:

Dalabyggð, kr. 8.680.000 og sérstakur byggðastyrkur kr. 5.800.000.

Snæfellsbær, kr. 22.555.000.

Snæfellsbær, kr. 17.350.000.

Snæfellsbær, kr. 6.953.000.

Skorradalshreppur, kr. 16.417.191.

Reykhólahreppur, kr. 19.000.000. og sérstakur byggðastyrkur kr. 6.500.000.

Ekki hafði verið fjallað um úthlutun Fjarskiptasjóðs í bæjarstjórnum eða -ráðum Grundarfjarðarbæjar og Akraneskaupstaðar þegar fréttin var rituð.

Þiggja styrki úr Fjarskiptasjóði