Skallagrímur laut í lægra haldi í dag gegn Keflavík í æsispennandi úrslitaleik Maltbikars kvenna í körfubolta. Leikurinn fór fram í Laugardalshöllinni í Reykjavík. Lokatölur leiksins urðu 65-62 fyrir Keflvíkinga sem þar með unnu sinn fjórtánda bikarmeistaratitil í sögunni. Afar góð stemning var á leiknum og voru stelpurnar úr Borgarnesi studdar dyggilega af hundruðum Skallagrímsmanna sem létu vel í sér heyra í stúkunni. Þetta var í fyrsta skipti sem Skallagrímur leikur til úrslita í bikarkeppni KKÍ.

Keflvíkingar byrjaði leikinn af krafti og voru komnar í 11-2 eftir þrjár mínútur. Skallagrímur bætti nokkrum körfum á móti það kom ekki í veg fyrir að Keflavík leiddi eftir leikhlutann með 8 stigum, 22-14. Skallagrímur lék betur í öðrum leikhluta og munaði verulega um góðar körfur frá Fanney Lind Thomas og Tavelyn Tilleman. Varnarleikur Skallagríms var líka öflugri og náði vörn liðsins að halda öflugasta leikmanni Keflavíkur, Ariönu Moorer, í skefjum. Þrjú stig skildu liðin að í hálfleik en þá var staðan 37-34 fyrir Keflavík.

: Laugardalshöllinn var þétt setin af stuðningsmönnum Skallagríms. Ljósm. jho.

: Skallagrímskonur undirbúa sig fyrir átökin. Ljósm. jho.

Jafnfræði var með liðunum í þriðja leikhluta sem einkenndist af mikilli baráttu. Keflavík var þó skrefinu á undan og skipti sköpum góð hittni liðsins fyrir utan þriggja stiga línuna. Stigamunurinn fór þó minnst í tvö stig. Staðan að loknum leikhlutanum var 52:46 fyrir Keflavík.

: Sigrún Sjöfn Ámundadóttir var mikilvæg sem fyrr í liði Skallagríms. Ljósm. jho.

Mikil spenna einkenndi lokaleikhlutann sem Keflavík leiddu framan af. Þegar um þrjár mínútur voru eftir var Keflavík komið með þægilega átta stiga forystu, 62:54. Þá kom góður kafli hjá Skallagrími. Fanney Lind Thomas setti niður þriggja stiga körfu sem kveikti í stuðningsmönnum Skallagríms. Sókn Keflvíkinga rann út í sandinn í kjölfarið sem leiddi til þess að Sigrún Sjöfn Ámundadóttir náði að saxa muninn enn meira fyrir Skallagrím með góðri tveggja stiga körfu, 62:59. Keflavíkingar náðu ekki að svara þessu í næstu sókn og því fékk Skallagrímur boltann. Það nýtti Tavelyn Tilleman sem skoraði góða körfu um leið og brotið var á henni. Vítaskotið setti hún niður í kjölfarið og því var staðan orðin jöfn í fyrsta skipti í leiknum 62-62. Tæp 1:30 mínúta var eftir af leiknum þegar þetta gerðist.

: Fanney Lind Thomas skoraði mikilvægur körfur í leiknum. Ljósm. jho.

: Kristrún Sigurjónsdóttir fer að körfunni. Ljósm. jho.

Keflvíkingar náðu ekki að nýta næstu sókn og fengu Skallagrímskonur gott tækifæri til að komast yfir þegar um 1 mínúta var eftir. Þriggja stiga skot Taveylin Tilleman geigaði hins vegar í næstu sókn. Það voru svo Keflvíkingar leiddar af Ariönu Moore sem höfðu betur á lokamínútunum. Keflavík var komið í bónus og fengu því vítaskot þegar Skallagrímurskonur brutu á Moore. Lokasóknir Skallgríms báru hins vegar ekki árangur. Lokatölur leiksins urðu 65:62.

: Eftir hetjulega baráttu varð Skallagrímur að sætta sig við silfur. Ljósm. jho.

Stigahæst í liði Skallagríms var Tavelyn Tilleman með 26 stig, en að auki tók hún 7 fráköst og gaf 6 stoðsendingar. Næst kom Sigrún Sjöfn Ámundadóttir með 13 stig en að auki reif hún niður 11 fráköst. Næstar komu Fanney Lind Thomas með 11 stig, Guðrún Ósk Ámundadóttir með 5 stig, Jóhanna Björk Sveinsdóttir með 3 stig og 9 fráköst, Kristrún Sigurjónsdóttir með 2 stig og Ragnheiður Benónísdóttir með 2 stig.

Þrátt fyrir að hafa verið grátlega nærri sigri geta Skallagrímskonur borið höfuðið hátt eftir glæsilega frammistöðu í Maltbikarnum. Framundan er áframhaldandi barátta um Íslandsmeistaratitilinn sem Skallagrímur mun gera tilkall til.

Skallagrímur tapaði í spennandi bikarúrslitaleik