Valdís Þóra Jónsdóttir, atvinnukylfingur úr Golfklúbbnum Leyni, hefur leik á sínu fyrsta móti á Evrópumótaröðinni í golfi þegar Oates Viv Open mótið hefst nærri Melbourne í Ástralíu. Er þetta í fyrsta sinn sem Valdís Þóra leikur á mótaröðinni en hún er þriðja íslenska konan sem tryggir sér keppnisrétt á þessari sterkustu mótaröð Evrópu. Í samtali við kylfing.is í dag kvaðst Valdís Þóra full eftirvæntingar fyrir mótinu og sagði undirbúninginn hafa gengið með ágætum. „Undirbúningurinn hefur gengið ágætlega. Ég hef lagt mesta áherslu á sveifluna og að bæta hana enn frekar. Fyrsta mótið er alltaf spennandi. Ég er komin með markmið en mun halda þeim á milli mín og minna þjálfara. Í fyrradag var fyrsti dagurinn frá því í Marokkó í desember þar sem ég sló af grasi þannig að ég tek bara einn dag í einu til að venjast því, ásamt tímamismuninum,“ segir Valdís Þóra.

Mótið hefst klukkan 20:00 í kvöld að íslenskum tíma en Valdís Þóra er í fyrsta ráshópum, sem hefur leik kl. 7:00 að morgni að staðartíma. Tamara Johns frá Ástralíu og Agathe Sauzon frá Frakklandi verða með Valdísi í ráshóp fyrstu tvo keppnisdagana.

Jafnhátt verðlaunafé karla og kvenna

Mótið er sögulegt því keppt verður í karlaflokki á sama tíma og mótið fer fram. PGA í Ástralíu er með atvinnumót karla samhliða LET mótinu og er leika kynin á báðum völlum samtímis. Þannig fer til dæmis karlaráshópur af stað kl. 20:10 að íslenskum tíma, á eftir ráshópi Valdísar.

Þá mun þetta vera í fyrsta sinn sem veitt eru jafnhátt verðlaunafé í karla- og kvennaflokki á atvinnumótaröð í golfi, heildarverðlaunafé er um 45 milljónir íslenskra króna á báðum mótaröðum.

Hér er hlekkur á heimasíðu mótsins þar sem skor keppenda verður uppfært á meðan móti stendur.

Valdís Þóra hefur leik í kvöld