Skallagrímur tryggði sér í kvöld sæti í úrslitum Maltbikars kvenna í körfuknattleik eftir sigur á ríkjandi bikarmeisturum Snæfells í mögnuðum leik í Laugardalshöll. Leikurinn var hnífjafn og æsispennandi, en alls 14 sinnum í leiknum voru liðin jöfn að stigum. Það var því við hæfi að leikurinn fengi hádramatískan endir, en úrslitin réðust ekki fyrr en á lokasekúndunum.

: Það var mikil og góð stemning meðal stuðningsmanna beggja liða. Ljósm. jho.

: Á endanum voru það þó Borgnesingar sem fögnuðu sigri. Ljósm. kgk.

Gangur leiksins

Liðin skiptust á stigum í fyrsta fjórðungi og Snæfell leiddi með einu stigi að honum loknum, 15-16. Áfram var leikurinn jafn og spennandi þar til líða tók að hálfleiknum. Þá náði Snæfell góðum kafla og leiddi verðskuldað í hálfleik, 30-38.

Skallagrímskonur tóku heldur betur á sig rögg eftir hléið, löguðu stöðuna og aðeins munaði einu stigi á liðunum fyrir lokafjórðunginn, 59-60. Leikurinn var í járnum lengst af í fjórða leikhluta og fleiri en einn og fleiri en tveir áhorfendur í stúkunni farnir að spá framlengingu. Snæfell náði smá rispu um miðjan lokafjórðunginn og fimm stiga forskoti. Skallagrímskonur tóku leikhlé og fóru yfir málin. Það kom sér vel því næstu mínúturnar minnkuðu þær forskot Snæfells og komust yfir. Aftur var stál í stál í Laugardalshöllinni og rafmögnuð stemning í stúkunni. Þegar 20 sekúndur voru eftir kom Andrea Björt Ólafsdóttir Snæfelli stigi yfir af vítalínunni, 67-68 og þá tóku Skallagrímskonur leikhlé og stilltu upp í skot. Með um tíu sekúndur eftir á klukkunni fór leikkerfi þeirra af stað sem endaði með því að boltinn barst á Sigrúnu Sjöfn Ámundadóttur fyrir utan þriggja stiga línuna. Hún gerði sér lítið fyrir og setti niður sitt eina þriggja stiga skot í leiknum þegar 4,6 sekúndur lifðu leiks og skaut Skallagrím þar með í úrslitin því Snæfelli tókst ekki að jafna á þeim stutta tíma sem eftir var. Er þetta í fyrsta sinn sem Skallagrímur kemst í úrslitaleik bikarkeppninnar.

: Sigrún Ámundadóttir setur niður sigurkörfu leiksins þegar 4,6 sekúndur voru eftir. Ljósm. jho.

Stigahæstu leikmenn

Tavelyn Tillman skoraði 20 stig fyrir Skallagrím og gaf átta stoðsendingar. Kristrún Sigurjónsdóttir var með 14 stig og sjö stoðsendingar og Ragnheiður Benónísdóttir 12 stig og níu fráköst. Jóhanna Björk Sveinsdóttir lauk leik með 10 stig, ellefu fráköst og fimm stoðsendingar og Sigrún Sjöfn Ámundadóttir var sömuleiðis með 10 stig, ellefu fráköst og fimm stoðsendingar, þar af síðustu þrjú stig leiksins og þau sem réðu úrslitum.

Í liði Snæfells var Aaryn Ellenberg atkvæðamest. Hún lauk leik með 27 stig, tíu fráköst og fimm stoðsendingar. Berglind Gunnarsdóttir var með 13 stig, fimm fráköst og fimm stoðsendingar og Andrea Björt Ólafsdóttir skoraði tíu stig.

Skallagrímur mætir Keflavík í úrslitum

Það er því ljóst að Snæfell nær ekki að verja bikarmeistaratitil sinn en Skallagrímur er á leið í úrslit bikarsins í fyrsta sinn í sögu félagsins. Úrslitaleikurinn fer fram í Laugardalshöll á laugardaginn, 11. febrúar og andstæðingar Skallagríms verður lið Keflavíkur, sem bar sigurorð af Haukum í hinum undanúrslitaleiknum fyrr í kvöld.

: Aaryn Ellenberg-Wiley skorar tvö af sínum 27 stigum með laglegu sniðskoti. Ljósm. sá.

: Sigrún Sjöfn ver skot Maríu Björnsdóttur. Ljósm.sá.

: Andrea Björt Ólafsdóttir og Kristrún Sigurjónsdóttir áttu góðan leik í kvöld. Ljósm. jho.

Skallagrímur sigraði Snæfell í hádramatískum leik