Golfklúbburinn Leynir á Akranesi hefur nú um nokkurt skeið undirbúið byggingu nýs klúbbhúss við Garðavöll. Núverandi félagsaðstaða Leynisfólks er fyrir löngu sprungin utan af starfseminni og beinlínis aftrar hún því að Leynir geti tekið að sér stærri mót. Í skipulagi fyrir Garðavöll er skilgreindur byggingarreitur fyrir nýtt klúbbhús og munu hundrað bílastæði sem fyrir eru við gamla klúbbhúsið nýtast komi til framkvæmda. Að sögn Guðmundar Sigvaldasonar framkvæmdastjóra Leynis er nú búið að vinna frumdrög teikninga að nýju 700 fm klúbbhúsi sem gæti í senn orðið félagsaðstaða Golfklúbbsins Leynis og fjölnota frístundahús fyrir ýmsa aðra starfsemi í bæjarfélaginu. Nú hafa golfklúbbsmenn átt viðræður vegna fjármögnunar væntanlegs verkefnis auk þess sem rætt hefur verið við bæjaryfirvöld á Akranesi um aðkomu þeirra að verkefninu auk þess sem rætt hefur verið við Félag eldri borgara á Akranesi og nágrenni um hugsanlega notkun á húsinu.

Guðmundur Sigvaldason segir að tímaáætlun geri ráð fyrir að byggingarframkvæmdir geti hafist næsta haust þannig og að þeim verði lokið fyrir upphaf golfvertíðarinnar sumarið 2018. „Í nýju klúbbhúsi horfum við til hönnunar á fjölnota félagsaðstöðu og sal fyrir allt að 200 manns. Við viljum gjarnan að félagsaðstaða okkar geti nýst sem best og þá allt árið. Til að auka nýtingarmöguleika hússins sjáum við fyrir okkur að akstri strætisvagns á Akranesi verði breytt þannig að hann fari alla leið upp á svæði golfklúbbsins. Þannig sjáum við fyrir okkur að félagsaðstaða golfklúbbins gæti orðið mikið notuð af félagsmönnum okkar yfir sumarið en eldri borgarar og aðrir félagahópar noti aðstöðuna svo meira yfir vetrartímann.“ Guðmundur segir að mjög jákvætt hafi verið tekið í hugmyndir golfklúbbsins og kveðst vongóður um að af framkvæmdum verði.

Sjá nánar í Skessuhorni sem kom út í dag.

Nýr golfskáli gæti jafnframt orðið fjölnota frístundamiðstöð