Heil umferð var leikin í Domino‘s deild kvenna í körfuknattleik um helgina. Á laugardag mættust Skallagrímur og Njarðvík. Leikið var suður með sjó. Skallagrímskonur voru sterkari allan leikinn en heimaliðið lét þó aðeins finna fyrir sér á köflum í síðari hálfleik. Fór að lokum svo að Skallagrímur sigraði með 13 stigum, 60-73.

Skallagrímskonur höfðu yfirhöndina í upphafi leiks og leiddi eftir fyrsta leikhluta, 18-24. Í öðrum fjórðungi áttu bæði lið fremur erfitt uppdráttar. Þau hittu illa og fyrir vikið var lítið skorað í leikhlutanum. Skallagrímskonur skoruðu 16 stig í fjórðungnum gegn aðeins átta stigum Njarðvíkur og höfðu því tólf stiga forystu í hálfleik, 26-38.

Skallagrímsliðið var áfram sterkara fyrst eftir hléið en eftir því sem leið á síðari hálfleikinn tók Njarðvík að saxa á forskotið. Þær náðu að minnka muninn í sjö stig fyrir lokafjórðunginn, 47-54. Þá gáfu Skallagrímskonur í og juku forskotið í 15 stig en Njarðvíkurliðið gafst ekki upp. Þær minnkuðu muninn á nýjan leik, en komust ekki nær en sem nam níu stigum seint í leiknum. Fór svo að lokum að Skallagrímur sigraði með 13 stiga mun, 60-73.

Tavelyn Tillman var atkvæðamest í liði Skallagríms. Hún skoraði 22 stig, gaf sex stoðsendingar og tók fimm fráköst. Sigrún Sjöfn Ámundadóttir skoraði 13 stig, tók sjö fráköst og gaf fimm stoðsendingar. Fanney Lind Thomas skoraði 13 stig einnig og Kristrún Sigurjónsdóttir skoraði tíu.

Var þetta níundi sigurleikur Skallagríms í röð og situr liðið sem fastast á toppi deildarinnar með 32 stig eftir 20 leiki. Hefur liðið tveggja stiga forskot á Snæfell og Keflavík sem eru jöfn að stigum í 2. og 3. sæti.

Næsti deildarleikur Skallagríms fer fram í Borgarnesi miðvikudaginn 15. febrúar næstkomandi. Þangað til leikur Skallagrímur í undanúrslitum bikarkeppninnar, en liðið mætir Snæfelli í Laugardalshöllinni á miðvikudaginn.

Sigurganga Skallagríms heldur áfram