Skallagrímur tók á móti Njarðvík í Domino‘s deild karla í körfuknattleik í gær. Leikurinn var jafn og spennandi meira og minna frá upphafi til enda en að lokum fór svo að Njarðvíkingar höfðu betur, 91-100.

Skallagrímsmenn mættu mjög ákveðnir til leiks og komust í 9-0 eftir tveggja mínútna leik en gestirnir jöfnuðu um miðjan upphafsfjórðunginn. Eftir það var mikið jafnræði með liðunum en Njarðvíkingar áttu lokaorðið í leikhlutanum og leiddu með fimm stigum að honum loknum, 25-30. Gestirnir höfðu síðan heldur yfirhöndina eftir það en Skallagrímsmenn voru aldrei langt undan. Í hléinu leiddu gestirnir 43-52 og leikurinn galopinn.

Skallagrímsmenn hófu síðari hálfleik af krafti, minnkuðu muninn í fimm stig en Njarðvíkingar stóðust áhlaupið. Snarpur leikkafli undir lok þriðja fjórðungs tryggði þeim tíu stiga forskot fyrir fjórða og síðasta leikhlutann. Þar gerðu Skallagrímsmenn atlögu að forystu þeirra á nýjan leik. Þeir jöfnuðu metin um miðjan leikhlutann og komust yfir þegar fjórar mínútur lifðu leiks. Forystunni héldu þeir hins vegar ekki lengi, því Njarðvíkingar voru sterkari á lokasprettinum og höfðu sigur, 91-1100 eftir æsispennandi lokafjórðung.

Flenard Whitfield fór mikinn í leiknum í gær og skilaði sannkallaðri tröllatvennu. Hann skoraði 32 stig og reif niður 21 frákast. Þá gaf hann að auki fimm stoðsendingar. Eyjólfur Ásberg Halldórsson skoraði 22 stig og tók níu fráköst, Sigtryggur Arnar Björnsson var með 16 stig og fimm stoðsendingar og Magnús Gunnarsson skoraði 15 stig.

Skallagrímur situr í 10. sæti deildarinnar með tólf stig eftir 16 leiki, tveimur stigum á undan Haukum sem eru í fallsæti. Næsti leikur Skallagríms fer fram fimmtudaginn 16. febrúar næstkomandi þegar liðið sækir Keflvíkinga heim.

Gestirnir voru sterkari á lokamínútunum