Fyrsta mót Vesturlandsdeildarinnar í hestaíþróttum fer fram í reiðhöllinni Faxaborg í Borgarnesi föstudagskvöldið 3. febrúar. Vesturlandsdeildin er einstaklings- og liðakeppni en 24 knapar mynda sex, fjögurra manna lið, sem etja kappi í sex greinum hestaíþrótta á fimm kvöldum nú í febrúar og mars.

Húsið verður opnað klukkan 18.00 og hefst dagskrá með setningu kl. 18.30. Loks er von á fyrsta hesti í braut kl. 19.00. Keppnisgrein þessa fyrsta kvöld í Vesturlandsdeildinni er fjórgangur og lofa mótshaldarar hörkukeppni þar sem von er á öllum sterkustu fjórgöngurum Vesturlands. Ráslisti verður birtir í kvöld, miðvikudag. Aðgangseyrir er 1500 krónur en þó frítt inn fyrir 10 ára og yngri.

Keppnislið:

Gufudagur/Arnbjörg/Söðulsholt sendir lið til keppni (fyrirvari er gerður um endanlegt nafn). Liðið skipa: Gunnar Halldórsson liðsstjóri, Styrmir Sæmundsson, Halldór Sigurkarlsson og Iðunn S Svansdóttir.

Sigurlið síðasta árs var Snókur/Cintamani. Það vann mjög öruggan sigur í deildinni í fyrra en liðsmennirnir hömpuðu liðsplattanum í fjórum af fimm greinum. Liðið mætir aftur til leiks í ár en hefur þó gengið í gegnum miklar mannabreytingar. Liðið skipa nú: Heiða Dís Fjeldsted sem er liðsstjóri, Þorgeir Ólafsson, Linda Rún Pétursdóttir og Benedikt Þór Kristjánsson sem er einn núverandi liðsmanna sem skipaði sigurlið síðasta árs.

Lið Leiknis átti góðu gengi að fagna í fyrra og hafnaði í öðru sæti liðakeppninnar en átti fulltrúa í öllum úrslitum. Liðið mætir með sama mannskap til leiks í ár en örlítil nafnabreyting hefur átt sér stað. Liðið heitir nú Leiknir/Skáney. Liðsmenn eru sem fyrr þau Randi Holaker liðsstjóri, Haukur Bjarnason, Berglind Ragnarsdóttir og Konráð Valur Sveinsson.

Snæfellsku hrossaræktarbúin Hrísdalur og Berg leggja saman í púkk og senda á nýjan leik lið í Vesturlandsdeildina í vetur. Liðsskipan er að mestu óbreytt en þó er Lárus Ástmar hættur en í hans stað kemur Guðný Margrét Siguroddsdóttir. Liðið skipa því Anna Dóra Markúsdóttir liðsstjóri, Jón Bjarni Þorvarðarson, Siguroddur Pétursson og nýliðinn Guðný Margrét.

Lið Eques er undir nýju nafni Fasteignamiðstöðvarinnar með örlitlum mannabreytingum frá síðasta ári. Liðið skipa sem fyrr þeir Guðmundur M. Skúlason liðsstjóri, Bjarki Þór Gunnarsson og Guðbjartur Stefánsson auk þess sem Þórdís Fjeldsted er gengin til liðs við þá.

Sjötta og síðasta keppnislið skipa þau Gyða Helgadóttir, Ólafur Axel, Thelma Harðardóttir og Marie Greve Rasmussen. Ekki lá fyrir þegar fréttin var skrifuð nafn þessa liðs né hver væri liðsstjóri.

Vesturlandsdeildin hefst á föstudaginn