Snæfell mætti Stjörnunni í Domino‘s deild kvenna í körfuknattleik í gær. Leikið var í Garðabænum og skemmst er frá því að segja að Snæfell réði ferðinni frá upphafi til enda og sigraði að lokum örugglega, 54-71.

Snæfell lék í leiknum með sorgarbönd á búningnum í minningu um Birgi Pétursson, ungan manns úr Stykkishólmi sem lést þegar snjóflóð féll í Esjuhlíðum á laugardag.

Leikurinn fór fremur rólega af stað hvað stigaskor varðar og staðan 2-2 eftir fyrstu þrjár mínútur leiksins. Eftir það tóku Snæfellskonur forystuna og létu hana aldrei af hendi það sem eftir lifði leiks. Þær leiddu örugglega með tíu stigum eftir fyrsta leikhluta, 10-20 og bættu enn við forskotið í öðrum fjórðungi. Stjarnan hafði ekki svör við góðum leik Stykkishólmsliðsins og Snæfell leiddi með 17 stigum í hálfleik, 44-27.

Forysta Snæfells var afgerandi og síðari hálfleikur var hvorki jafn né spennandi. Snæfell jók muninn lítillega í þriðja fjórðungi en Stjarnan gerði sig aldrei líklega til að gera nokkra atlögu að forskoti Íslandsmeistaranna. Úrslit leiksins voru ráðin fyrir lokafjórðunginn og um hann miðjan var mestur munur á liðunum, en Snæfell leiddi þá með 25 stigum. Undir lokin náði heimaliðið örlítið að klóra í bakkann en ekkert meira en það. Leiknum lauk með öruggum 17 stiga sigri Snæfells, 54-71.

Aaryn Ellenberg-Wiley var atkvæðamest leikmanna Snæfells með 26 stig, sex stoðsendingar og fimm fráköst. Berglind Gunnarsdóttir kom henni næst með ellefu stig og 13 fráköst.

Snæfell situr í 2. sæti deildarinnar með 28 stig eftir 19 leiki, jafn mörg stig og Keflavík í sætinu fyrir neðan en tveimur stigum á eftir toppliði Skallagríms.

Snæfell leikur næst á sunnudaginn, 5. febrúar, þegar liðið mætir Grindavík. Sá leikur fer fram í Stykkishólmi.

Öruggur sigur Snæfells á Stjörnunni