Skallagrímur mætti Haukum í 19. umferð Domino‘s deildar kvenna í körfuknattleik í gær. Leikið var í Hafnarfirði og þar kræktu Skallagrímskonur í áttunda sigurleikinn í röð þegar þær lögðu Hauka 55-61. Eru þær nú ósigraðar síðan í byrjun desembermánaðar og tróna á toppi deildarinnar.

Skallagrímsliðið var heldur sterkara í upphafi leiks en Haukar náðu góðum leikkafla undir lok fyrsta fjórðungs og minnkuðu muninn í tvö stig áður en hann var úti. Þær komust síðan stigi yfir í upphafi annars leikhluta og eftir það var mikið jafnræði með liðunum allt til loka fyrri hálfleiks. Þau skiptust á að leiða en í hléinu voru það Haukar sem höfðu eins stigs forystu, 32-31.

Liðin héldu áfram þaðan sem frá var horfið eftir hléið. Þriðji leikhluti var hnífjafn og spennandi allt þar til á lokamínútum hans. Þá urðu þáttaskil í leiknum þegar Skallagrímskonur náðu fimm stiga forskoti, 45-40, sem þær fóru með inn í lokafjórðunginn. Þær létu forystuna aldrei af hendi og gerðu út um leikinn í fjórða leikhluta. Mest náðu þær 13 stiga forskoti þegar fjórar mínútur lifðu leiks og reyndist það of mikið fyrir Haukakonur sem gerðu hvað þær gátu að minnka muninn. Þær komust hins vegar ekki nær en sem nam fimm stigum. Skallagrímskonur sigruðu með 61 stigi gegn 55 og kræktu þar með í áttunda sigurleikinn í röð.

Tavelyn Tillman var stigahæst í liði Skallagríms með 18 stig en hún tók fimm fráköst að auki og vann boltann fimm sinnum. Kristrún Sigurjónsdóttir var með 14 stig og sex fráköst og Sigrún Ámundadóttir lauk leik með tíu stig, 13 fráköst og sjö stoðsendingar.

Sem fyrr segir trónir Skallagrímur á toppi Domino‘s deildarinnar. Liðið hefur 30 stig og er tveimur stigum á undan Snæfelli og Keflavík sem eru jöfn að stigum í 2. og 3. sæti.

Næst leikur Skallagrímur á laugardaginn, 4. febrúar, þegar liðið heimsækir Njarðvík.

Áttundi sigur Skallagríms í röð