ÍA mætti liði FSu í 1. deild karla í körfuknattleik í gærkvöldi. Leikið var á Selfossi. Eftir góðan fyrri hálfleik Skagamanna komust heimamenn inn í leikinn í þriðja leikhluta og hleypa spennu í leikinn. Skagamenn höfðu þó betur eftir spennandi lokafjórðung, 65-70 og kræktu í fimmta sigur sinn í deildinni.

Mikið jafnræði var með liðunum á upphafsmínútum leiksins en á lokamínútum fyrsta leikhluta náðu Skagamenn góðum kafla og góðri átta stiga forystu fyrir annan leikhluta, 13-21. Þar héldu Skagamenn uppteknum hætti og stjórnuðu gangi mála inni á vellinum. Heimamenn gerðu lítið annað en að halda í við ÍA og í hálfleik leiddu Skagamenn með sex stigum, 27-33.

ÍA var áfram betra lið vallarins fyrst eftir hléið og náðu mest tíu stiga forskoti. Það var ekki fyrr en seint í þriðja leikhluta að lið FSu náði góðum leikkafla og minnkaði muninn í aðeins eitt stig fyrir lokafjórðunginn, 49-50 og hleyptu heldur betur spennu í viðureignina. Leikurinn var í járnum framan af fjórða leikhluta, staðan var ýmist jöfn eða ÍA stigi yfir og útlit fyrir spennuþrungnar lokamínútur. Skagamenn voru hins vegar ekki á því, náðu snörpum kafla eftir miðjan fjórða leikhluta og átta stiga forskoti þegar aðeins mínúta lifði leiks og tryggðu sér þar með sigurinn. Heimamenn náðu aðeins að klóra í bakkann í blálokin en ekkert meira en það. Skagamenn höfðu fimm stiga sigur, 65-70.

Ármann Örn Vilbergsson var atkvæðamestur í liði Skagamanna með 21 stig og tíu fráköst. Áskell Jónsson skoraði 17 stig, Andri Jökulsson var með 13 og Derek Shouse var með tíu stig og tíu fráköst.

Skagamenn sitja í 8. og næstneðsta sæti deildarinnar með tíu stig, tveimur stigum á eftir FSu og Vestra en síðarnefnda liðið á þó tvo leiki til góða.

Næst leikur ÍA fimmtudaginn 2. febrúar næstkomandi þegar liðið tekur á móti Hamri.

Skagasigur eftir spennandi síðari hálfleik