Skallagrímur heimsótti Grindavík þegar leikið var í Domino‘s deild kvenna í körfuknattleik í gær. Leikurinn var aldrei neitt sérstaklega spennandi. Skallagrímskonur voru sterkari allan tímann en leikur Grindavíkur var mjög kaflaskiptur. Að lokum fór svo að Skallagrímur vann nokkuð þægilegan 16 stiga sigur, 67-83.

Í blábyrjun leiksins var nokkuð jafnræði með liðunum en strax um miðjan upphafsfjórðunginn náði Skallagrímsliðið yfirhöndinni. Þær leiddu með fimm stigum eftir fyrsta leikhluta, 20-25 en snemma í öðrum leikhluta náði Grindavíkurliðið smá rispu og minnkaði muninn í þrjú stig. Þá gáfu Skallagrímskonur í, juku forskot sitt jafnt og þétt það sem eftir lifði fyrri hálfleiks og leiddu með tíu stigum í hléinu, 32-42.

Eftir hléið gerðu Skallagrímskonur síðan endanlega út um leikinn. Þær voru einfaldlega mun sterkari, léku frábæra vörn og náðu mest 25 stiga forskoti seint í þriðja leikhluta en heimakonur náðu þó að minnka muninn í 17 stig fyrir lokafjórðunginn. Það dugði þeim hins vegar skammt því Skallagrímsliðið gaf aldrei færi á sér en hélt forskoti sínu meira og minna óbreyttu allt til leiksloka. Þegar lokaflautan gall munaði 16 stigum á liðunum. Skallagrímur sigraði, 67-83.

Tavelyn Tillman var stigahæst í liði Skallagríms með 27 stig og sex stoðsendingar að auki. Kristrún Sigurjónsdóttir skoraði 17 stig og tók átta fráköst og Sigrún Sjöfn Ámundadóttir skoraði 13 stig og tók 15 fráköst.

Eftir sigurinn situr Skallagrímur sem fyrr í 2. sæti deildarinnar með 26 stig eftir 17 leiki, jafn mörg og topplið Keflavíkur en tveimur stigum á undan Snæfelli í sætinu fyrir neðan.

Næst leika Skallagrímskonur laugardaginn 28. janúar næstkomandi þegar þær fá Keflvíkinga í heimsókn í Borgarnes.

Nokkuð þægilegur sigur Skallagríms