Snæfell og Njarðvík mættust í Domino‘s deild kvenna í körfuknattleik á laugardag. Leikið var í Njarðvík og gerðu Snæfellskonur góða ferð suður með sjó. Vendipunkturinn í leiknum var stórkostlegur annar leikhluti Snæfellskvenna, þar sem þær skoruðu 34 stig gegn níu og gerðu út um leikinn. Að lokum fór svo að sigur þeirra var æði stór, 64-93.

Leikurinn fór fremur rólega af stað og jafnt var á með liðunum í upphafi. Í fyrsta leikhluta skiptust þau síðan á að leiða en Snæfell hafði tveggja stiga forskot eftir upphafsfjórðunginn, 17-19. Upphófst þá frábær annar leikhluti Snæfells þar sem gæðamunurinn á liðunum duldist engum. Með afar góðum leik bæði í vörn og sókn skoruðu þær 34 stig gegn aðeins níu stigum Njarðvíkur og kláruðu leikinn í rauninni í öðrum fjórðungi.

Í hléinu leiddi Snæfell með 53 stigum gegn 26 og heimakonur komust aldrei inn í leikinn á ný. Snæfellskonur skoruðu fyrstu stig síðari hálfleiksins og héldu um það bil 30 stiga forskoti meira og minna allt til leiksloka. Þegar lokaflautan gall var staðan 64-93 og öruggur 29 stiga stórsigur Snæfells staðreynd.

Aaryn Ellenberg-Wiley átti afar góðan leik og daðraði við þrennuna. Hún skoraði 21 stig, gaf tíu stoðsendingar og tók átta fráköst. Berglind Gunnarsdóttir skoraði 16 stig og tók sex fráköst og reynsluboltinn Alda Leif Jónsdóttir lauk leik með ellefu stig.

Snæfell situr sem stendur í 3. sæti deildarinnar með 22 stig eftir 16 leiki, tveimur stigum á eftir Keflavík og Skallagrími í efstu sætunum tveimur en fjórum stigum á undan Stjörnunni í sætinu fyrir neðan.

Næst leikur Snæfell á miðvikudaginn, 25. janúar, þegar liðið mætir Val. Sá leikur fer fram í Stykkishólmi.

Snæfellskonur stungu af í öðrum leikhluta