Nýliðaslagur var í Domino‘s deild karla í körfuknattleik á föstudag þegar Skallagrímur tók á móti Þór frá Akureyri. Leikurinn var jafn og spennandi lengst af. Skallagrímsmenn voru heldur sterkari framan af fyrri hálfleik en í þeim síðari snerist taflið við og Þórsarar höfðu að lokum sigur, 89-100.

Heimamenn byrjuðu af krafti og náðu undirtökunum snemma leiks en Þórsarar gerðu hvað þeir gátu að halda í við þá. Skallagrímur leiddi eftir fyrsta leikhluta, 33-24. Í öðrum fjórðungi fundu norðanmenn betur taktinn, jöfnuðu í 37-37 og komust síðan fimm stigum yfir áður. Forskot þeirra varði hins vegar ekki lengi því Skallagrímsmenn spýttu í, komust yfir á nýjan leik og leiddu með einu stigi í hléinu, 51-50.

Leikurinn var í járnum í upphafi síðari hálfleiks og liðin skiptust á að leiða með örfáum stigum. Seint í þriðja fjórðungi fór að halla undan fæti hjá Skallagrímsmönnum. Voru þeir þar sjálfum sér verstir og hálfpartinn köstuðu leiknum frá sér. Þeir misstu einbeitinguna í vörninni og töpuðu boltanum of oft í sókninni. Fyrir vikið komust gestirnir yfir og náðu átta stiga forskoti fyrir lokafjórðunginn. Skallagrímsmenn reyndu að svara fyrir sig í upphafi fjórða leikhluta en komust aldrei nær en sem nemur fimm stigum. Þórsarar stóðust áhlaupið, settu allt á fullt og náðu 16 stiga forskoti þegar fimm mínútur voru eftir og stjórnuðu gangi leiksins. Skallagrímsmenn náðu ekki að svara fyrir sig og að lokum unnu gestirnir ellefu stiga sigur, 89-100.

Flenard Whitfield fór mikinn í liði Skallagríms með 35 stig, 15 fráköst og sex stolna bolta. Sigtryggur Arnar Björnsson skoraði 17 stig og gaf níu stoðsendingar, Darrel Flake skoraði 13 og tók sjö fráköst og Magnús Þór Gunnarsson skoraði tíu stig og gaf fimm stoðsendingar.

Skallagrímur situr í 10. sæti deildarinnar með tólf stig eftir 14 leiki, tveimur stigum á undan Haukum í næstneðsta sæti en jafn mörg og jafn mörg og Njarðvík og ÍR í sætunum fyrir ofan. Síðastnefnda liðið er einmitt næsti andstæðingur Borgnesinga. Skallagrímur og ÍR mætast fimmtudaginn 26. janúar næstkomandi í Reykjavík.

Skallagrímsmenn töpuðu nýliðaslagnum