Skallagrímur mætti Stjörnunni í Domino‘s deild kvenna í körfuknattleik á laugardag. Leikið var í Borgarnesi og voru Skallagrímskonur í miklu stuði á heimavelli. Þær voru sterkari allan leikinn og leiddu frá upphafi til enda. Að lokum fór svo að þær höfðu fimm stiga sigur, 79-74.

Skallagrímskonur skoruðu fyrstu stig leiksins en hann fór heldur rólega af stað. Liðin fylgdust að lungann úr upphafsfjórðungnum en Skallagrímur alltaf feti framar, eins og átti eftir að verða saga leiksins. Þær leiddu með sex stigum, 21-15 eftir fyrsta leikhluta og komust í tíu stiga forystu snemma í öðrum. Þá tók Stjarnan smá kipp og minnkaði muninn í fimm stig en komust ekki nær. Borgnesingar hleyptu þeim aldrei inn í leikinn að ráði og leiddu með átta stigum í hléinu, 40-32.

Skallagrímskonur komu mjög ákveðnar til síðari hálfleiks og náðu 16 stiga forskoti snemma í þriðja fjórðungi. Stjarnan kom aðeins til baka en Skallagrímur stjórnaði alltaf ferðinni og þær leiddu 62-50 eftir þriðja leikhluta. Þær voru áfram sterkari í lokafjórðungnum en tókst þó ekki að slíta sig almennilega frá Stjörnunni frekar en fyrr í leiknum. Að lokum fór svo að Skallagrímur hafði fimm stiga sigur, 79-74 .

Tavelyn Tillman var atkvæðamest Skallagrímskvenna með 21 stig, átta fráköst og fimm stoðsendingar. Sigrún Sjöfn Ámundadóttir og Ragnheiður Benónísdóttir skoruðu ellefu stig hvor og Sigrún bætti við það sex fráköstum en aðrar höfðu minna.

Skallagrímur hefur 22 stig í 2. sæti deildarinnar og er jafnt toppliði Keflavíkur að stigum eftir 16 leiki en tveimur stigum á undan Snæfelli sem vermir 3. sætið.

Næsti leikur Skallagríms fer fram miðvikudaginn 25. janúar þegar liðið heimsækir Grindavík.

Skallagrímskonur feti framar Stjörnunni