Móttaka fyrir ungt fólk hefur verið sett á laggirnar á Heilbrigðisstofnun Vesturlands í Borgarnesi. Markmiðið með þjónustunni er að auka aðgengi ungmenna að heilbrigðisþjónustu, að bjóða upp á ráðgjöf og fræðslu og stuðla að bættri líðan. Að sögn Lindu Kristjánsdóttur yfirlæknis á HVE í Borgarnesi er móttökunni sinnt af lækni og hjúkrunarfræðingi í samvinnu við sálfræðing, næringarfræðing og sjúkraþjálfara HVE. „Þetta spannst út frá því að eftir að hjúkrunarfræðingur tók til starfa í Fjölbrautaskóla Vesturlands á Akranesi kom í ljós að þörfin hjá nemendum fyrir slíka þjónustu þar var mjög mikil. Við ákváðum því að setja í gang þessa móttöku hérna. Við ákváðum að bjóða ekki upp á þetta í menntaskólanum, til að geta líka náð til þeirra sem ekki eru í skóla,“ segir Linda í samtali við Skessuhorn. Um er að ræða tilraunaverkefni sem boðið verður upp á út þetta ár.

Móttakan er ætluð fyrir ungmenni á aldrinum 15 til 20 ára og nær því einnig til þeirra sem eru á efsta ári í grunnskóla og er opin fyrsta þriðjudag hvers mánaðar á milli klukkan 16 og 18. Linda segir að sá tími henti vel, enda er ekki síðdegisvakt á heilsugæslunni í Borgarnesi. „Við vildum hafa þetta á þeim tíma sem ekki væri mikið að gera á heilsugæslunni og það er vonandi auðveldara fyrir krakkana að koma á þessum tíma en dagvinnutíma. Það er alltaf læknir og hjúkrunarfræðingur á staðnum og við höfum aðgang að sálfræðingum og annarri sérfræðiþjónustu ef þarf.“

Sinna málum af ýmsum toga

Á móttökunni er reynt að sinna vandamálum af ýmsum toga, bæði líkamlegum og andlegum. Meðal annars er boðið upp á rannsóknir og meðferð vegna kynsjúkdóma og ráðgjöf vegna getnaðarvarna og kynheilbrigðis. Þá er stefnan sett á að bæta geðheilbrigði með aukinni þjónustu til þeirra sem kljást við tilfinningaleg og andleg vandamál. „Við vildum auka þjónustustigið fyrir þennan aldurshóp. Við sinnum ekki vottorðabeiðnum eða almennum pestarvanda en í raun öllu öðru. Hægt er að leita ráða varðandi mataræði, hreyfingu, almenna heilsu, langvinna verki, andlega heilsu og svo framvegis. Við tökum að okkur að veita ráð og meðhöndla eða að koma fólki áfram til sérfræðinga. Við sáum einnig fyrir okkur að ef þetta verður vel sótt að hægt verði að hafa fræðslu í framhaldinu, til dæmis um kvíða, næringu eða aðra stutta fræðslupunkta,“ segir Linda.

Ungmennamóttakan er sem fyrr segir opin fyrsta þriðjudag hvers mánaðar á milli klukkan 16 og 18. Ekki þarf að panta tíma, heldur má mæta á staðinn eða hringja í símanúmerið 831-2500 þegar móttakan er opin.

Ungmennamóttaka opnuð í Borgarnesi