Snæfell heimsótti Njarðvík í Domino‘s deild karla í körfuknattleik að kvöldi síðasta föstudags. Snæfell lék án erlends leikmanns og mun sú verða raunin það sem eftir lifir mótsins, en Christian Covile, sem liðið hafði samið við mun ekki leika með því og hefur verið sendur heim. Ástæðan er sú að hann er á sakaskrá í heimalandinu og fær því ekki atvinnuleyfi. Þrátt fyrir að blási verulega á móti Snæfelli þessa dagana sýndu leikmenn liðsins góða spretti í Njarðvík á föstudag en urðu að lokum að sætta sig við nokkuð stórt tap. Njarðvík vann með 99 stigum gegn 70.

Jafnt var á með liðunum í upphafi leiks og ekki fyrr en undir lok upphafsfjórðungsins sem heimamenn náðu góðum kafla og sjö stiga forystu fyrir annan fjórðunginn. Þeir voru áfram sterkari næstu mínúturnar og juku forskot sitt lítillega en eftir því sem leið nær hálfleiknum sóttu Hólmarar í sig veðrið. Þeir minnkuðu muninn í fjögur stig skömmu fyrir hléið en heimamenn skoruðu síðustu körfuna og staðan 46-40 í hálfleik.

Snæfellingar hófu síðari hálfleikinn af krafti og hleyptu Njarðvíkingum ekki lengra frá sér. Það var síðan á seinni helmingi þriðja leikhluta að heimamenn tóku að síga fram úr. Þeir höfðu 15 stiga forskot fyrir lokafjórðunginn og í honum skildu leiðir endanlega. Njarðvíkingar settu í fluggírinn, skoruðu 27 stig gegn 13 stigum Snæfells og unnu að lokum með 29 stiga mun, 99-70.

Viktor Marinó Alexandersson var atkvæðamestur leikmanna Snæfells með 20 stig, fjögur fráköst og fjórar stoðsendingar. Næstur honum kom Árni Hrafn Elmarsson með 16 stig og sjö fráköst og Sveinn Arnar Davíðsson skoraði tíu stig, tók fjögur fráköst og gaf fjórar stoðsendingar.

Snæfell er enn stigalaust á botni deildarinnar eftir 13 leiki í mótinu. Næst mæta þeir Keflvíkingum fimmtudaginn 19. janúar. Sá leikur fer fram í Stykkishólmi.

Lánleysi Snæfells heldur áfram