Snæfell mætti Stjörnunni í átta liða úrslitum Maltbikars kvenna, bikarkeppni KKÍ, í gær. Eftir jafnan og spennandi leik voru það bikarmeistarar Snæfells sem höfðu betur eftir góðan endasprett, 68-63.

Stjarnan byrjaði betur og hafði undirtökin í leiknum þar til Snæfell komst í gang og náði forystunni seint í upphafsfjórðungnum. Það varði hins vegar ekki lengi, því gestirnir jöfnuðu og komust síðan yfir snemma í öðrum leikhluta og leiddu með fjórum stigum í hálfleik, 31-27.

Leikurinn varð enn jafnari eftir hléið. Stjarnan leiddi en Snæfell komst upp að hlið gestanna um miðjan þriðja leikhluta og jafnaði metin skömmu síðar. Stjarnan átti þó lokaorðið í leikhlutanum og fór með þriggja stiga forskot inn í lokafjórðunginn, 51-54. Aftur jafnaði Snæfell metin í upphafi fjórða leikhluta, en Stjarnan náði þá ágætum tveggja mínútna kafla og fjögurra stiga forskoti. En það átti eftir að hverfa með góðum endaspretti Snæfells. Bikarmeistararnir gáfu í um miðjan lokafjórðunginn en Stjarnan var þó ekki tilbúin að láta forskotið af hendi og leiddu enn með einu stigi þegar þrjár mínútur lifðu leiks. Þá komust Snæfellskonur yfir og sneru taflinu sér í vil. Stjarnan skoraði ekki stig síðustu þrjár mínúturnar og Snæfell kláraði leikinn af vítalínunni undir lokin og sigraði með 68 stigum gegn 63.

Aaryn Ellenberg-Wiley var atkvæðamest í liði Snæfells með 24 stig, tíu fráköst og sjö stoðsendingar. Gunnhildur Gunnarsdóttir var með 18 stig og sex fráköst og Berglind Gunnarsdóttir skoraði tólf stig og tók tíu fráköst.

Bikarmeistararnir eru komnir í undanúrslit Maltbikarsins. Dregið verður um viðureignir í undanúrslitum á morgun. Í pottinum eru Snæfell, Haukar og Keflavík auk sigurvegarans úr leik Skallagríms og KR, sem fram fer í kvöld.

Bikarmeistararnir komnir í undanúrslit