Á fundi í sveitarstjórn Borgarbyggðar í gær lagði Guðveig Eyglóardóttir, oddviti minnihlutans í sveitarstjórn, fram tillögu þess efnis að Borgarbyggð fái óháðan aðila til að fara yfir feril, málsmeðferð og lagalega stöðu vegna húsbygginga við Borgarbrautar 57-59 í Borgarnesi. Eins og kunnugt er hafa framkvæmdir verið stöðvaðar í kjölfar úrskurðar Úrskurðarnefndar um umhverfis- og auðlindamál sem gaf það út að framkvæmdin samrýmdist ekki gildandi skipulagi fyrir Miðbæ Borgarness. Í tillögunni segir að skoða verði málið m.t.t. hugsanlegs bótaréttar á hendur sveitarfélaginu. Þá lagði Guðveig til að haldinn verði íbúafundur hið fyrsta til að upplýsa íbúa um stöðu byggingaframkvæmda og hvers megi vænta í framhaldinu. Málið fékk talsverða umræðu í sveitarstjórn þar sem fimm fulltrúar af níu tóku til máls. Samþykkt var samhljóða tillaga forseta sveitarstjórnar að vísa tillögu Guðveigar til byggðarráðs. Fram hefur komið að fulltrúar allra flokka í sveitarsjórn eru þrátt fyrir þetta fylgjandi því að lokið verði við uppbyggingu á fyrrgreindum miðbæjarreit. Gagnrýni Framsóknarmanna beinist fyrst og fremst að málsmerð vegna framkvæmda á svæðinu.

Í bókun sem Guðveig Eyglóardóttir lagði fram fyrir hönd fulltrúa Framsóknarflokksins, er lýst þungum áhyggjum af stöðu mála á Borgarbraut 57-59. „Ljóst er að krafa um málshraða gæti haft ófyrirséðar afleiðingar í för með sér.“ Þá segir að fulltrúar í Framsóknarflokknum hafi lagt á það áherslu í umræðum um samninga í framhaldi af því að lóðinni var úthlutað að jafnræðis yrði gætt, ábyrgri stjórnsýslu yrði ekki fórnað fyrir kröfu um málshraða og að tekið yrði mið af lögfræðiáliti tveggja lögfræðinga þar sem skýrt kom fram að Borgarbyggð gæti ekki vikið frá gjaldskrá um gatnagerðargjöld né samþykkt sveitarstjórnar um greiðsludreifingu við innheimtu gatnagerðargjalda. „Eins og undirrituð hafa áður nefnt var sérstaklega eftirminnilegt að fulltrúar í sveitarstjórn þurftu að lesa um það í fjölmiðlum þegar fyrsta skóflustungan var tekin. Það var gert án vitundar minnihluta sveitarstjórnar, og án vitneskju um innihald samnings sem ekki hafði verið lagður fyrir byggðarráð eða sveitarstjórn,“ segir í bókun Guðveigar. Þá segir: „Brýnt er að óháður aðili verði fengin til að fara yfir ferli málsins allt frá byrjun og greina lagalega stöðu sveitarfélagsins í málinu, íbúar verði upplýstir um málið og unnið verði markvisst að bæta vinnubrögð til framtíðar þar sem tryggt verði að embættismenn séu varðir fyrir ágangi og kröfum um vinnubrögð sem standast ekki faglega stjórnsýslu.“

Vilja kalla faglegan ráðgjafa til aðstoðar

Á fundi sveitarstjórnar í gær barst jafnframt í tal að forsvarmenn sveitarstjórnar vilja að fenginn verði óháður fagaðili til að gera úttekt á verkferlum innan umhverfis- og skipulagssviðs. Þá er ekki endilega verið að vísa í mál vegna Borgarbrautar 57-59 heldur ekki síður ýmis önnur mál sem undir sviðið heyrir. Töluverð starfsmannavelta hefur verið á sviðinu og fjölmörg verkefni í gangi í héraðinu sem kalli á skjótari málshraða en hægt hefur verið að bjóða undanfarin misseri. Slíkur óháður verktaki færi m.a. yfir innri verkferla og fyrirkomulag stjórnsýslu á sviðinu. Fram kom á sveitarstjórnarfundi að bæta þurfi afgreiðsluhraða til að íbúar og framkvæmdaaðilar fái fyrr svör við erindum sínum. Björn Bjarki Þorsteinsson oddviti Sjálfstæðisflokks og Geirlaug Jóhannsdóttir oddviti Samfylkingar og forsvarsmenn í meirihluta sveitarstjórnar staðfesta bæði í samtali við Skessuhorn að ríkur vilji sé hjá þeim sé til að ganga í slíka úttekt sem fyrst. Málið verður formlega tekið fyrir á byggðarráðsfundi fimmtudaginn 20. janúar.

Lagt til að óháður aðili fari yfir lagalega stöðu húsbygginga