Skallagrímur heimsótti Íslandsmeistara KR í Domino‘s deild karla í körfuknattleik í gær. Fyrirfram bjuggust flestir við sigri KR og það nokkuð þægilegum en sú varð hreint ekki raunin. Íslandsmeistararnir þurftu framlengingu til að leggja Borgnesinga í leik þar sem Skallagrímur kom alltaf til baka og Sigtryggur Arnar Björnsson og Flenard Whitfield fóru á kostum. Lokatölur urðu 99-92, KR í vil.

Jafnt var á með liðunum í upphafi leiks en KR-ingar hrukku í gang um miðjan fyrsta leikhluta. Með góðum leikkafla náðu þeir 13 stiga forskoti áður en Skallagrímsmenn komu til baka og minnkuðu muninn í átta stig fyrir lok upphafsfjórðungsins. KR-ingar voru áfram heldur sterkari það sem eftir lifði hálfleiks en þegar komið var fram undir miðjan annan leikhluta tóku Skallagrímsmenn að minnka forskot heimamanna að nýju. Þegar flautað var til hálfleiks leiddu KR-ingar með fjórum stigum, 43-39.

Skallagrímsmenn mættu mjög ákveðnir til síðari hálfleiks, komu sér snarlega upp að hlið KR-inga og tóku forystuna með einu stigi skömmu síðar. Heimamenn náðu henni þó aftur í næstu sókn og voru sterkari síðustu mínútur þriðja leikhluta. Skilaði sá leikkafli þeim tíu stiga forskoti fyrir lokafjórðunginn, 74-64. KR-ingar skoruðu fyrstu stig fjórða leikhluta en eftir það komust Skallagrímsmenn á mikinn skrið að nýju og minnkuðu muninn í fjögur stig. Þeir héldu áfram og þegar þrjár mínútur lifðu leiks munaði aðeins tveimur stigum á liðunum. Íslandsmeistararnir skoruðu næstu körfurnar en Skallagrímsmenn áttu lokaorðið og jöfnuðu metin þegar 14 sekúndur voru eftir. KR-ingar fengu færi á að stela sigrinum með lokaskoti leiksins en það geigaði og því þurfti að framlengja.

Í framlengingunni var leikurinn í járnum. KR-ingar skoruðu fyrstu körfuna en Skallagrímur svaraði og þannig gekk framlengingin fyrir sig. Hverri körfu var svarað og leikurinn jafn, 92-92, þegar aðeins mínúta var eftir. Þá náðu KR-ingar fimm stiga rispu á aðeins nokkurra sekúndna kafla og gerðu í raun út um lekinn á ögurstundu. Þeir bættu tveimur stigum við áður en leikurinn var úti og sigruðu að lokum með sjö stigum, 99-92.

Sem fyrr segir áttu Sigtryggur Arnar og Flenard sannkallaðan stórleik á móti Íslandsmeisturunum. Sigtryggur Arnar skoraði 37 stig, tók fimm fráköst og gaf fjórar stoðsendingar. Flenard skoraði 30 stig og reif niður hvorki fleiri né færri en 29 fráköst.

Í liði KR var Borgnesingurinn Pavel Ermolinskij atkvæðamestur og aðeins hársbreidd frá þrennunni. Hann lauk leik með 31 stig, 15 fráköst og níu stoðsendingar.

Eftir leikinn situr Skallagrímur í 8. sæti deildarinnar með tólf stig, jafn mörg og Keflavík og ÍR í sætunum fyrir ofan og neðan og tveimur stigum á eftir liðunum í 4.-6. sæti.

Næsti deildarleikur Skallagríms fer fram í Borgarnesi föstudaginn 20. janúar þegar liðið fær Þór Akureyri í heimsókn.

Fóru með Íslandsmeistarana í framlengingu