„Þetta er glæsilegt skip og nú verður stefnan tekin til Íslands,“ segir Friðleifur Einarsson, skipstjóri á Engey RE á vef fyrirtækisins. Snjókoma í Tyrklandi hefur tafið lítið eitt fyrir upprunalegri áætlun um heimferð skipsins, en það er væntanlegt fyrir lok mánaðarins til Reykjavíkur. Þaðan verður Engey svo siglt á Akranes þar sem millidekks- og lestarbúnaður, meðal annars karaflutningskerfi, frá Skaganum 3X verður sett um borð.

Ísfisktogarinn Engey RE hefur sem kunnugt er verið í smíðum fyrir HB Granda í skipasmíðastöðinni Celiktrans í Tyrklandi og er fyrsta af þremur systurskipum sem raðsmíðuð verða þar. Sama stöð smíðaði auk þess uppsjávarveiðiskipin Venus og Víking. Sjö manna áhöfn siglir Engey nú heim. Auk Friðleifs Einarssonar skipstjóra munu bróðir hans, Einar Bjarni Einarsson stýrimaður, Emil Sigurður Magnússon stýrimaður, Bjarni Bjarnason matveinn, Magnús Sigurðsson yfirvélstjóri og vélstjórarnir Sigurður R. Sigurðsson og Siguróli Sigurðsson standa vaktina á heimsiglingunni.

Engey RE er 54,75 metrar að lengd og 13,5 metrar að breidd. Aðalvélin er af gerðinni MAN 6L27/38 og er skráð afl hennar 1.790 kW við 800 snúninga á mínútu. Niðurfærslugír er frá Reintjes með PTO fyrir ásrafala. Skrúfa er frá MAN og er hún 3,8 m í þvermál. Vélin er útbúin með mengunarvarnarbúnaði af gerðinni SCR Catalysator. Tvær MAN ljósavélar eru um borð og er afl hvorrar um sig 443kW. Spilkerfið er frá Naust Marine og eru allar vindur rafknúnar. Bógskrúfa er frá Brunvoll og er hún 300 kW. Millidekks- og lestarbúnaður verður smíðaður hjá Skaganum 3X og verður hann settur í skipið á Íslandi. Hönnuður skipsins er Alfreð Tulinius skipatæknifræðingur hjá Nautic ehf.

Eins og sjá má á meðfylgjandi myndum, frá skipasmíðastöðinni Celiktrans er aðbúnaður um borð í skipinu framúrskarandi. Hvort sem litið er til vistarveru áhafnar, matsalinn, eldhúsið eða sjálfa brúna.

Von er á Engey RE til lands fyrir lok mánaðarins