Skessuhorn fjallaði nú í vikunni um skort á íbúðum á almennum fasteignamarkaði á suðvesturhorni landsins. Sagt var frá hvernig fjárfestar hafa „hamstrað“ fasteignir á almennum markaði og greitt jafnvel yfirverð í samkeppni við almenna fasteignakaupendur. Á kynningarfundi sem Íbúðalánasjóður hélt í morgun kom fram að einungis þúsund fasteignir eru í byggingu á höfuðborgarsvæðinu, en áætlað er að um fjögur þúsund þyrftu að vera í smíðum til að anna þörfum markaðarins. Þar var jafnframt undirstikað að alvarlegur skortur er á fasteignum á markaði. „Ástandið er farið að sýna merki þess að það séu ákveðnar hættur í gangi. Það er alvarlegur skortur á framboði fasteigna til sölu, hvort sem við lítum til notaðra eigna eða nýrra,“ sagði Sigurður Jón Björnsson framkvæmdastjóri fjárstýringar hjá Íbúðalánasjóði. Slíkt ástand leiðir til yfirverðs og bólumyndunar á fasteignamarkaði sem endað gæti illa fyrir skuldsetta kaupendur húsnæðis. „Eðlilegar eignir, og ég tala nú ekki um góðar eignir, seljast jafnvel þegar þær eru fyrst boðnar til sýnis og haldið opið hús. Og jafnvel á verði sem er yfir því sem sett var á þær fyrir mjög skömmu síðan. Þannig að þetta er greinilega eitthvað til að hafa áhyggjur af,“ sagði sviðsstjórinn hjá ÍLS.

Byggja leiguíbúðir

Íbúðalánasjóður kynnti jafnframt úthlutun sína á ríflega tveggja milljarða króna stofnframlögum til byggingar 385 íbúða, svokallaðra leiguheimila, um allt land. Leiguheimilin verða byggð á hagkvæman hátt og leigð út á 20 til 30% lægra verði en íbúðir á almenna leigumarkaðinum. Þetta er fyrsta úthlutunin frá gildistöku laga um almennar íbúðir.

Þó svo farið verði í byggingu fyrrgreindra leiguíbúða leysir útleiga þeirra hvergi nærri þann skort sem nú er á fasteignamarkaði.

Alvarlegur íbúðaskortur á fasteignamarkaði