Auður H. Ingólfsdóttir, lektor við Félagsvísindadeild Háskólans á Bifröst, varði doktorsritgerð sína Climate Change and Security in the Arctic. Analysis of Norms and Values Shaping Climate Policy in Iceland í Háskólanum í Lapplandi 16. desember síðastliðinn. Um er að ræða sameiginlega doktorsgráðu frá Stjórnmálafræðideild Háskóla Íslands og Félagsvísindasviði Háskólans í Lapplandi. Þar með eru allir fastir kennarar við Félagsvísindadeild Háskólans á Bifröst með doktorsgráðu.

Rannsóknarefni Auðar voru loftslagsbreytingar og öryggismál á Norðurslóðum og voru leiðbeinendur Auðar þau Þorgerður Einarsdóttir, prófessor í kynjafræði við Stjórnmálafræðideild, og Lassi Heininen, prófessor í málefnum norðurslóða við Háskólann í Lapplandi. Andmælendur voru þau Dr. Teemu Palosaari og Dr. Annica Kronsell. Dr. Lassi Heininen stjórnaði athöfninni.

Hugtök úr femínisma og kynjafræði notuð sem greiningartæki

Auður leitar svara við eftirfarandi spurningu í doktorsrannsókn sinni; Þrátt fyrir að loftslagsbreytingar ógni bæði náttúru og samfélögum manna hefur alþjóðasamfélagið verið svifaseint að bregðast við. Hvaða pólitísku og efnahagslegu hagsmunir og menningarlegu gildi koma í veg fyrir að við grípum til aðgerða? Hún beitir tilviksrannsókn til að skoða áhrif loftslagsbreytinga, pólitíska orðræðu og undirliggjandi gildi þessarar orðræðu í einu ríki á Norðurslóðum, Íslandi. Rannsóknin byggist á kenningum feminískrar mótunarhyggju þar sem hugtök úr femínisma og kynjafræði eru notuð sem greiningartæki. Gögnin sem stuðst er við samanstanda af stefnumarkandi skjölum, viðtölum við fólk sem hefur beitt sér í umræðu um loftslagsmál og ræðum stjórnmálamanna.

„Tilviksrannsóknin sýnir að þrátt fyrir að fólk upplifi loftslagsbreytingar sem ógn á Íslandi þá sé ógnin óljós og fjarlæg og litlar rannsóknir eru til um samfélagsleg áhrif hennar. Eftir greiningu á stefnumótun og orðræðu um loftslagsmál á Íslandi er niðurstaðan sú að þau undirliggjandi gildi sem vísa veginn í opinberri stefnumörkun eru hvorki afgerandi karllæg né kvenlæg. Rannsóknin dregur hins vegar fram mikilvægi þess að horfa heildstætt á umræðuna í samfélaginu og setja orðræðu um loftslagsbreytingar í samhengi við ríkjandi orðræðu um öryggi og efnahagsþróun,“ segir Auður um niðurstöður rannsóknarinnar.

Hægt er að nálgast rafræna útgáfu af ritgerð Auðar á heimasíðu Háskólans á Bifröst; www.bifrost.is

Nýr doktor við félagsvísindadeild Háskólans á Bifröst