Rúta með 43 ferðamönnum, auk fararstjóra og bílstjóra, valt á Snæfellsnesvegi skammt frá Urriðaá á Mýrum um klukkan 17 í dag. Flestir sem í rútunni voru sluppu án meiðsla. Þrír voru þó fluttir til læknisskoðunar, flestir með mar og tognun, en hugsanlega voru þó einhver beinbrot. Enginn var alvarlega slasaður að sögn lögreglu. Rauði krossinn var fenginn til að opna fjöldahjálparstöð og var það gert á Akranesi. Fólkinu var ekið í húsnæði Björgunarfélags Akraness þar sem rætt var við það, gefið kaffi og hressing.

Ferðafólkið var á vegum Kynnisferða. Því hafði verið safnað saman á hótelum í Reykjavík í morgun og var að koma úr dagsferð um Snæfellsnes þegar óhappið átti sér stað. Helga Guðmundsson fararstjóri gat í samtali við blaðamann Skessuhorns ekki sagt til um hvað olli því að rútan fór útaf og valt á hliðina. Veður hafi verið skaplegt og engin hálka. Bíllinn var á lítilli ferð, vegkantur lágur og hafnaði rútan á hliðinni á fremur mjúkri jörð. Allir sem í rútunni voru höfðu auk þess öryggisbeltin spennt. Öll þessi atriði hafi blessunarlega orðið til þess að fáir slösuðust og fólkið var að sögn Helga ótrúlega rólegt og engin panik greip um sig. „Ég byrja á að hringja í 112 og láta vita um óhappið. Eftir það tek ég ákvörðun um að láta fólkið bíða inni í bílnum uns hjálp barst. Þetta gerist stutt frá Borgarnesi þannig að við þurftum ekki að bíða lengi. Við náum að opna hurð rútunnar sem sneri upp og síðan er okkur hjálpað að lyfta fólki upp og út úr bílnum,“ segir Helgi.

Ferðafólkið er af nokkrum þjóðernum, flestir þó frá Kína og Suður-Kóreu. Blaðamaður ræddi við tvo farþega sem báðir voru ótrúlega yfirvegaðir þrátt fyrir það sem á undan hafði gengið.

Ferðafólkið í fjöldahjálparstöð RKÍ á Akranesi. Flestir voru að láta ættingja vita af sér. Ljósm. mm.

Helgi Guðmundsson fararstjóri (t.v.) ræðir hér við Heiðar Sveinsson hjá RKÍ á Akranesi.

Lögregla, björgunarsveitarfólk og fólk frá RKÍ ræddi við fólkið.

Rúta með 45 manns valt á hliðina