Síðustu leikir Domino‘s deildar kvenna í körfuknattleik fyrir jólafrí voru leiknir á laugardaginn var. Snæfell tók á móti Grindavík í Hólminum og höfðu Íslandsmeistararnir þriggja stiga sigur, 75-72, eftir spennandi lokamínútur.

Jafnræði var með liðunum í upphafi leiks en gestirnir komust yfir fyrir miðjan leikhlutann og leiddu að honum loknum, 19-23. Þá hertu Snæfellskonur varnarleikinn og komust stigi yfir snemma í öðrum fjórðungi. En gestirnir svöruðu fyrir sig, komust yfir á nýjan leik og leiddu með fimm stigum þegar fjórar mínútur voru til hálfleiks. Þá tóku Snæfellskonur góða rispu, enduðu fyrri hálfleikinn af krafti og leiddu með einu stigi í hléinu, 38-37.

Leikurinn var í járnum fyrst eftir hléið og framan af þriðja fjórðungi skiptust liðin á að leiða með einu stigi. Um miðjan leikhlutann náðu Snæfellskonur hins vegar yfirhöndinni í leiknum og leiddu með fimm stigum þar til leikhlutinn var úti. Staðan fyrir lokafjórðunginn var 60-55, Snæfelli í vil en úrslit leiksins hvergi nærri ráðin. Snæfell var áfram skrefinu á undan framan af fjórða leikhluta en þegar um fimm mínútur lifðu leiks voru gestirnir farnir að þjarma verulega að forystu þeirra. Grindavík minnkaði muninn í eitt stig og náðu síðan að jafna í 69-69 þegar aðeins ein og hálf mínúta var eftir. Þá stigu Snæfellskonur upp og sýndu úr hverju þær eru gerðar. Þær byrjuðu á því að setja þriggja stiga skot og leiddu með þremur stigum þar til hálf mínúta lifði leiks. Grindvíkingar tóku leikhlé og ætluðu að stilla upp í skot. Snæfellskonur stálu hins vegar boltanum og bættu tveimur stigum á töfluna. Gerðu þessi tvö atvik út um leikinn og gestirnir rétt náðu að klóra í bakkann á síðustu sekúndunum. Lokatölur í Stykkishólmi 75-72, Snæfelli í vil.

Aaryn Ellenberg-Wiley var atkvæðamest Snæfellskvenna í leiknum. Hún skoraði 35 stig, tók tíu fráköst, gaf sex stoðsendingar og stal boltanum sex sinnum. Gunnhildur Gunnarsdóttir var með 14 stig og Bryndís Guðmundsdóttir skoraði 12 en aðrar höfðu minna.

Sigurinn á Grindavík gerði það að verkum að Snæfell heldur öðru sæti deildarinnar fram yfir jól og áramót hið minnsta. Liðið hefur 18 stig eftir 13 leiki, jafn mörg og Skallagrímur í sætinu fyrir neðan en fjórum stigum frá fyrsta sætinu. Næsti leikur Snæfell sannkallaður toppslagur, en liði fer suður með sjó og mætir toppliði Keflavíkur laugardaginn 7. janúar næstkomandi.

Sýndu úr hverju þær eru gerðar á lokamínútunum